Ua tuuina mai e le Faamasinoga Maualuga le aso e iloiloina faatasi ai moliaga a Lema’i Sione ma Malele Paulo, o loo tuuaia i lo la fuafuaina e faaoo le maliu (conspiracy to murder) i lē sa fai ma Palemia o Samoa, Tuilaepa Sailele Malielegaoi.
O Lema’i Sione ma Malele Paulo aka King Faipopo, sa molia faatasi ma Talalelei Pauga, o se tagatanuu Samoa ma Ausetalia e nofo mau i Ausetalia. Ua molia faatasi i latou, i ni fuafuaga e faataunuu le le maliu ia Tuilaepa.
E toafā i latou sa molia faatasi i lenei mataupu, ae o Taualai Leiloa, 39, mai Magiagi ma Laulii, sa ia ioeina ona moliaga ma faapea mai, o ia sa faatonuina ma totogi i tupe, e faataunuu a latou fuafuaga.
Na saunoa le afioga i le Faamasino Sinia o le Faamasinoga Maualuga ia Vui Clearance Nelson, o le faaiuga a le Faamasinoga, sa fuaina lea i le lē mafai ai e leoleo ona aumai Talalelei Pauga i Samoa.
Saunoa Vui, ua talia e le faamasinoga, e tasi lava le mataupu o loo molia ai le toatolu lea ma o se tulaga faigofie foi mo Faamasino le tasi o le taimi e suesueina ai.
Ae peitai, e le mautinoa se aso e toe foi mai ai Talalelei Pauga, ae o mataupu ogaoga faapenei e tatau lava ona fai iai se faaiuga i se taimi vave.
Saunoa Vui o le a fai ese le faamasinoga a Malele Paulo ma Lema’i Sione, ae o loo tuu atu pea le avanoa i leoleo, pe afai e mafai ona latou aumaia Talalelei Pauga i ise taimi.
Saunoa Vui, “O le popolega a le Faamasinoga, pe ua aloaia faava-o-malo le tusi samani o Talalelei, ae pē na logo aloaia foi le tatau lea ona ia auai i le aso ua atofaina mo le faamasinoga i Samoa.”
O le itu a leoleo sa taitaia e le Sui Loia Sili (Assistant AG) poo le afioga ia Lupematasila Iliganoa Atoa. O Malele Paulo sa tulai ai le alii loia ia Quentin Sauaga, ae o Lema’i Simanu Sione o loo tulai ai le tamaitai loia ia Unasa Iuni Sapolu.
Sa talosagaina le suesue faatasi o moliaga a Lema’i Sione, Malele Paulo faapea Talalelei Pauga, o loo molia faatasi i le latou faatonuina o Taualai Leiloa, e tagatavaleina Tuilaepa.
O le alii o Taualai Leiloa, o se tamā mai le afioaga o Magiagi ma Laulii sa ia ioeina ona moliaga ia Tesema 2020, ma tuuina mai ai loa e le Faamasinoga se faasalaga falepuipui e lima tausaga.
Sa ta’u tino e Taualai Leiloa i luma o le Faamasinoga Maualuga; o Aperila o le tausaga 2019 sa mua’i fesootai mai ai e Talalelei Pauga ia i luga o le messenger.
O le molimau a Taualai, sa lafo mai ia te ia ni tupe e Talalelei Pauga, ma ia faatonuina mai uma mea e agai atu iai e faaoo le maliu ia Tuilaepa e pei o Taaloga o le Pasefika, o le falesa Katoliko i Siusega, ma le faleia i le taeao o le Aso Sa.
“According to Taualai Leiloa, the first plan was to assassinate the Prime Minister at the Opening of the Pacific Games in July 2019. Failing this, he was told to go to the Catholic Church at Siusega to wait for the Prime Minister when he attended early morning Sunday mass. The third location he was sent to by Pauga was the fish market, on Father’s Sunday in August 2019.”
Sa molimau foi Taualai, sa tuuina atu ia te ia se aupega laau malosi faapea ma le taavale sa momoli atu e Lema’i ia te ia.
O Taualai sa tuuina mai e le Faamasinoga lona faasalaga e 5 tausaga i le toese ia Tesema o le 2020. O lenei ua silia ma le 2 tausaga talu ona tuuina atu Taualai i le falepuipui, ae lei suesueina lava King Faipopo ma Lema’i Sione.
Ina ua tuuin mai e le tamaitai Faamasino ia Tologata Tafaoimalo Leilani Tuala-Warren le faasalaga ia Taualai Leiloa, sa ia saunoa ai i le ogaoga tele o lenei mataupu.
“A conspiracy to murder the Prime Minister of any democratic country in the world is an attack on democracy itself. It cannot and should not be taken lightly”.
Ua tele tausaga o tosoina pea lenei mataupu, ao faagasolo fetuunaiga a le Ofisa o le Loia Sili ma Ausetalia, ina ia toe faafoi mai Talalelei Pauga e tali atu i ona moliaga, ae le’i mafai lava.
O lea la ua tuuina mai e le Alii Faamasino ia Vui, “O le tologa mulimuli lea, ma e lē faatalia foi e le Faamasinoga, le auai mai o Talalelei Pauga.”
Saunoa manino le Alii Faamasino, “O le tiute lena a le itu a leoleo.”
Ua faatulaga nai e le Faamasinoga le Aso 13 o Mati o le a suesueina ai lenei mataupu, ae ua tuuina atu le taimi nei i le itu a leoleo e tapena ai mau mo Malele Paulo faapea Lema’i Sione.
