Toe Talosaga Edward Fanueli mo se Avanoa e Tatala ai i Tua e Tālia le Faamasinoga

"E lima moliaga e aofia ai le fasioti tagata faamoemoeina o se tamaitai leoleo"

0
5162

Ua toe tuuina atu i luma o le Faamasinoga Maualuga se talosaga a lē o loo molia i le fasioti tagata faamoemoeina o se tamaitai leoleo, mo se avanoa e tatala ai o ia i tua e tālia ai le aso e suesueina ai le mataupu, lea o loo faamoemoe mo Mati 2024.

O le alii o Edward Brian Fanueli, 31 tausaga, sa avea foi o ia ma Malu o le Malo, ae o loo molia nei i le fasioti tagata faamoemoeina ina ua tulai mai se faalavelave ia Tesema o le 2022, lea sa maliu ai se tamaitai leoleo.

Na faateia le Matagaluega o Leoleo i le maliu ai o Mele Segisolo Lapana i le vaveao tonu lava o le Kerisimasi i le tausaga ua tea atu nei. O loo tuuaia sa tagatavaleina le tamaitai Malu o le Malo e le alii o Edward Fanueli i se laau malosi i le ituaiga o le pistol, ma o nei ituaiga fana e lē faatagaina i totonu o Samoa.

O le masina o Fepuari na tuuina atu ai se talosaga a Edward Fanueli mo le tatalaina o ia i tua (on bail) ae sei tālia le aso o le faamasinoga ae peitai, sa tetee malosi iai le itu a leoleo ma lē taliaina ai e le Faamasinoga Maualuga.

O loo teena e Fanueli moliaga e lima o loo faasaga ia te ia, ma o le amataga o lenei vaiaso sa toe tuuina atu ai se toe talosaga e tauala atu i lana loia, le afioga ia Leiataualesa Jerry Brunt, mo se avanoa e tatala ai o ia i tua ao tālia le Aso 4 o Mati 2024.

Sa faatulaga mai e lana afioga ia Fepuleai Ameperosa Roma le Aso 7 o Aokuso e tuuina atu ai lenei talosaga mo se iloiloga a le Faamasinoga.

O moliaga e lima e aofia ai le

* fasioti tagata faamoemoeina (murder)

* faaoo man’ua (gbh)

* fasioti tagata paivalea (manslaughter)

* uumia o se aupega matautia (armed with a dangerous weapon)

* uumia o se aupega le faatagaina (armed with an unlawful weapon)

O lē o loo molia nei sa fai se la faigauo ma le tamaitai leoleo ua maliu. I se faamatalaga na tuuina mai e aiga o Mele Lapana, ua tetea i lā’ua nei ina ua faamutaina e lē ua maliu le faigauo.

O lona uso matua sa faapea mai, o Mele o le uii o le latou aiga. E tatalo i le ao ma le po latou matua ina ia puipuia o ia i lana galuega, ae ua ese lenei faafitauli ua tulai mai, ma vave motusia ai le mafutaga”.

Ua ma’ea ona teuina le tino maliu o le tamaitai leoleo, ae mai lena taimi e oo mai i le taimi nei o loo taofia pea Fanueli i lalo o le vaavaiga a leoleo.