Teena e se Faifeau EFKS Moliaga o le Saini Faamalosi o Tupe a le Ekalesia

'O le tulaga ua tulai mai ua vā ai le fogavaa ma ua lē maua ai se nofo filemu o l e Ekalesia"

0
8467

Sa tulai i luma o le Faamasinoga Maualuga se faifeau e tali atu i se tagi o loo tuuaia ai e se vaega o lana Ekalesia.

O Clay Tofilau o le faifeau Ekalesia Faalapotopotoga Kerisiano Samoa mai Savaia Tai, o loo molia ma tuuaia i le saini faamalosi o tupe (forgery) a le Ekalesia atoa ai ma lona fa’aaogaina.

I taualumaga o le Faamasinoga i le vaiaso nei, na tuuina mai ai e le itu a leoleo e tauala mai loia a le Ofisa o le Loia Sili ni moliaga se lima.

O loo teena e le susuga i le faafeafaiga moliaga uma o loo faasaga atu ia te ia. Sa tulai le susuga i le alii loia ia Leiataualesa Komisi Koria mo le faifeau.

Ua faatulaga e lana afioga i le Faamasino ia Fepuleai Ameperosa Roma le Aso 26 Fepuari 2024 e toe fofogaina ai lenei mataupu ma suesueina ai mau a le itu a leoleo, atoa ai foi ma mau a lē o loo tuuaia.

Na molimauina le faatumulia o le potu faamasino i sui o le Ekalesia EFKS mai Savaia. O i latou e lagolagoina le faifeau atoa ma i latou na moliaina le faifeau i luma o le faamasinoga.

O fafo mai o le potu faamasino na tā’ua ai e se tasi o tamā o le Ekalesia e na te lei manao e faailoa lona suafa, o le tulaga ua tulai mai ua vā ai le fogavaa ma ua lē maua ai se nofo filemu o le latou Ekalesia.

Na fesootai atu le failautusi a le EFKS mo se faamatalaga, peitai, na tā’ua e le tamaitai ofisa na taliina mai le telefoni, e le o avanoa mo se faamatalaga.

O loo tatala nei i tua le faifeau i tuutuuga ma aiaiga masani e saini ai i le ofisa o leoleo, e tālia ai le aso e iloilo ai lenei mataupu i le tausaga fou.