Teena e Edward Fanueli Moliaga o le Fasioti Tagata Faamoemoeina sa maliu ai se Tamaitai Leoleo

Ua teena e lē o loo molia i le maliu o se tamaitai leoleo ona moliaga i luma o le Faamasinoga Maualuga.

Na faateia le Matagaluega o Leoleo i le maliu ai o Mele Segisolo Lapana i le vaiaso tonu lava o le Kerisimasi i le tausaga ua tea atu nei. O loo tuuaia sa tagatavaleina o ia e le alii o Edward Fanueli i se laau malosi i le ituaiga o le pistol. O nei ituaiga fana e le faatagaina i Samoa nei.

Sa tetee atu Edward Fanueli i moliaga uma e lima o loo faasaga ia te ia, e aofia ai le fasioti tagata faamoemoeina. O le alii loia ia Leiataualesa Jerry Brunt o loo tulai mo Fanueli.

O Edward sa avea ma Malu o le Malo, ae sa faamavae ina ua faasolo suesuega faalotoifale a le Matagaluega i nisi sa masalomia o loo iai latou sootaga i fualaau faasaina.

O moliaga e lima sa fofogaina e le itu a leoleo e ala atu i le tamaitai loia ia Lupematasila Iliganoa Atoa o le Ofisa o le Loia Sili e aofia ai le fasioti tagata faamoemoeina (murder), fasioti tagata paivalea (manslaughter), faaoolima tūgā (GBH grievous bodily harm ), umia o se a’upega matautia (armed with a dangerous weapon) ma le umia o se a’upega e le faatagaina (possession of an unlawful weapon).

Ua faatulaga le faamasinoga e tauala mai lana afioga le faamasino Fepuleai Ameperosa Roma mo le Aso 28 o Aokuso 2023 e suesueina ai mau a le itu a leoleo e tali atu ai le teena o Fanueli o ona moliaga.

Ae ua faatulaga foi le faamasinoga le aso 15 o le masina nei e suesueina ai le talosaga a Edward Fanueli, e tauala mai lana loia ina ia tatala o ia i tua e talia ai le aso o le faamasinoga.

O loo teena e le itu a leoleo le talosaga a Leiataualesa mo se avanoa e tatala ai Fanueli i tua.

O loo faa’auau pea ona nofo taofia lea alii i lalo o le vaavaiga a leoleo.

(0)