Teena se Talosaga a Edward Fanueli ina ia Tatala ia i Tua e Tālia ai le Faamasinoga

0
110

Aso Lua 21 Fepuari 2022. Na teena e le Faaamasinoga Maualuga i le asō se talosaga a Edward Fanueli ina ia tatala ia i tua e tālia ai le aso e toe valaau ai lenei mataupu i le Aso 28 Aokuso 2023.

E Fanueli o se alii sa avea ma leoleo, peitai, na faamalolo ina ua suesueina nisi o le Matagaluega sa masalomia i le faaogaina o fualaau faasaina.

O Edward Fanueli e 5 moliaga o loo feagai ma ia e aofia ai le fasioti tagata faamoemoeina (murder) faapea moliaga o le fasioti tagata paivalea (manslaughter) ma le faaoolima tugā (grievous bodily harm). O loo molia foi Fanueli i le faaogaina o se aupega e faasā i totonu o Samoa.

O loo molia a leoleo Fanueli i se faalavelave ma maliu ai le tamaitai leoleo ia Mele Segisolo Lapana, lea sa fanaina i se aupega malosi ao lei aulia le Kerisimasi i le Aso 24 Tesema 2022

O le vaiaso ua tea sa iloilo ai e le Faamasinoga le talosaga tatala i tua a lē ua molia (bail hearing). Sa tetee malosi le loia mo leoleo, le afioga ia Lupematasila Iliganoa Atoa ma finau atu o ia e faatumau pea Fanueli i lalo o le vaavaaiga a leoleo e tālia ai le Faamasinoga ia Aokuso.

I le tolaulauina o le faaiuga a le tamaitai faamasino ia Tafaoimalo Tologata Leilani Tuala-Warren, na ia tuuina mai ai se tapu e taofia ai le faasalalauina o nisi lava faamatalaga o lenei mataupu..

Sa saunoa manino le tamaititi faamasino, o lenei mataupu ua tele ni faamatalaga ua maea ona aveina i luga o aupega tafailagi ma e ono lamataia ai le aia tatau o lē ua molia, ae maise lava pe afai o le a iloiloina e ni faatonu (panel of assessors).

O lea la, ua na o le pau lava le itu e faatagaina ona faasalalau e le au tusitala, o le teetee atu lea o le Faamasinoga i le tatalaina i tua o Fanueli.

I totonu o le potu faamasino na molimauina ai matua ma le aiga a le alii o Edward Fanueli.

Sa auai atu foi matua o le tamaitai leoleo ua maliu, faapea ona uso. Sa molimauina le tutulu o matua ao faagasolo le lauina o le faaiuga o lenei mataupu.