Ua tatala nei i tua e le Faamasinoga Maualuga fanau mai Leufisa sa latou faatino se faaoogalima, ma pue i se ata na faasalalau i luga o le Facebook ma upega tafa’ilagi.
O Asomaliu Asomaliu, Peniamina Lisona ma Tuafale Faafetai, ua tatala nei i tua e le Afioga ia Fepuleai Ameperosa Roma i tuutuuga e aofia ai le nofo mau i Leufisa, saini i le ofisa o Leoleo i vaiaso taitasi, ma aua nei toe molia mai lava i se isi soligatulafono.
Ua faatulaga e le Faamasinoga le Aso Gafua o le vaiaso fou, e toe tulai ai i latou nei e tali atu i o latou moliaga o le faaoolima (assault), faaoolima tuga (grievous bodily harm) ma le faomea poo le gaoi (robbery).
Mo Peniamina Lisona ma Tuafale Faafetai o loo iai se tamaitai loia o loo tula’i mo i laua. Sa ia talosagaina se taimi ina ia feutaga’i ai ma Peniamina ma Tuafale ao le’i tuuina mai se la tali i moliaga a le itu a leoleo.
O Asomaliu Asomaliu ua tuuina atu foi iai e Fepuleai Ameperosa Roma le vaiaso e tasi e saili ai sana loia e tulai mo ia, i lalo o le Polokalame Fesoasoani Faaletulafono a le Malo (Legal Aid). O Asomaliu ua na o ia o le toafa lenei sa molia muamua i le tulafono (previous convictions).
O le isi o talavou o loo molia, o se tamaititi e na o le 15 tausaga lona matua. Na tatala i tua e le Faamasinoga Maualuga i le vaiaso talu ai.
Ua faasee atu nei lana mataupu i le Faamasinoga Tupulaga Talavou (Youth Court) ma o le a tulai ai i le Aso Lulu 30 Aukuso 2023. E leai foi sana loia. Sa faatonuina e le Alii Faamasino le resitara e faatulaga fuafuaga uma mo le legal aid e fesoasoani atu mo ia.
O fanau nei e toafa sa latou faaoolima i se taulealea mai le afioaga o Laulii. O latou gaioiga uma sa pueina i se ata, ma o lea ata sa faasoa e le toatele ma faasalalau i luga o le Facebook.
O lenei mataupu na tula’i mai ai nisi faalavelave i lena lava vaiaso ina ua faalauiloa ma faasalalau le video i luga o upega tafa’ilagi.
Sa iai foi nisi video sa faasalalau e le mamalu o le atunuu, o loo iloa atu ai se talavou o loo fasi toatele e nisi, ae le’i aafia i le faalavelave na tula’i mai i Motootua.
I lea lava mataupu sa talosagaina ai e leoleo le faamalumalu a Alii ma Faipule, e faaitiitia ai nisi o aafiaga o lenei faafitauli ina ua tulai mai.
Public Notices
Tender
Vacancies
Teuila Programme
