Toafā Alii Talavou o loo Taofia e Leoleo i le Faalavelave na Tulai mai i Motootua sa Manu’a Tūgā ai se Talavou mai Laulii

0
4563
Police Commissioner Auapaau Logoitino Filipo.

Ua taofia nei e leoleo ni alii talavou o loo tuuaia i le latou faaoo o man’uaga tuga i se alii talavou mai le afioaga o Laulii, ma se tasi alii talavou sa la toalua.

Video ua faasalalauina faalauaitele i luga o upega tafa’ilagi

O lenei faalavelave na tulai mai i Motootua, i le itu tonu o le falemai lea e faafesagai ma le falemaliu o Sefo.

O loo maua lelei i se ata video sa pueina e se tasi sa iai i lea taimi, le taoto i lalo o se alii talavou ua ia lē toe iloa se mea, ae faaauau pea ona faaoolima iai nisi alii talavou. Sa latou tu’iina lona ulu i le sima, ma taa’a i lona ulu ma soli lona manava, sei tulou.

Police Commissioner Auapaau Logoitino Filipo.

Sa maea ona latou tosoina lea i lalo o lona ofuvae, ae toso lona tino i luma o le auala. O le lata i le auala, o loo iloa atu ai, o autafa o le falemai i Motootua lea e fai ai le sauniga a nei alii i lē ua aafia.

Na faamaonia mai e le Komesina o Leoleo ma Falepuipui, le afioga Auapaau Logoitino Filipo, e toafā i latou o loo taofia nei.

Saunoa Auapaau, o nei alii e toafa, ei le vā o le sefuluiva, luasefulu, ma le luasefulutasi tausaga, mai le afioaga o Leufisa.

“Ua molia i latou i le fao mea, faaoolima, ma le faaoo o man’ua tuga, ma o loo taofia e leoleo le taimi nei.”

O le asō sa maua ai e leoleo nei alii, ae na saunoa mai le Komesina, “O loo tālia le taunuu atu o le Resitala, e iloa ai pe tatala i latou i tua, aemaise o le faatulagaina o se aso e tulai ai ai i luma o le Faamasinoga.”

O loo taofia i le falemai i Motootua lē sa aafia ma o loo faasolosolo ina toe faafoisia lona malosi.

O se tasi itu lē lelei ua tulai mai i lenei faalavelave, o le aafia ai lea o talavou mai Motootua o loo feoai i le taulaga, ae leai se latou fesootaiga i le faalavelave.

E pei o se tasi talavou o loo faali mai i se ata sa pueina i le maketi i Savalalo, o loo fasi toatele e ni talavou o loo masalomia e omai i Laulii.

O se talavou o loo fasi toatele e nisi e aofia ai talavou nei e toalua, faapea ma nisi talavou ma tagata matutua sa iai.

O se tasi foi talavou o loo pueina mai le ata o loo fasi tele i nisi. E le gata o talavou e toalua o loo faali atu i ata nei, ae o iai foi talavou ma ē matutua o loo latou taofia sia alii, ao tagi mai e lē o ia na aafia i le faalavelave.

O se tasi molimau mai le afioaga o Laulii, sa ia tāua, e lelei pe afai ua taofia e leoleo nei alii mai Leufisa.

“Auā e taofiofi gata le tupulaga talavou, ona o loo manino lelei foliga o si talavou lea sa fasi toatele..”

Ua talosagaina e leoleo le faamalumalu a Alii ma Faipule, e faaitiitia nisi aafiaga o lenei faafitauli ua tulai mai.