Latalata i le Afe i Latou ua Toe Faafoisia le Malosi mai le Faamai o le Koviti

0
254
MOH says 927 community cases have recovered. Photo: MOH

4 Aperila 2022, Apia Samoa. I se tala lata mai o le pesi ai o le Koviti i Samoa, ua faamauina ai le Matagaluega o Soifua Maloloina le 927 o e sa aafia i le faamai pesi, ae ua toe faafoisia le malosi, ma ua toe maloloina.

O le faamatagala lea sa maua mai i le Tala Lata Mai o le Koviti na tuuina mai mo le silafia e le mamalu o le atunu’u, mai faamaumauga o le asõ, Aso Sa, 03 Mati, 2022.

Na fa’amaonia mai ai e le Matagaluega o le Soifua Maloloina le a’afia ai oi latou fou (new cases) e 164 mai le mamalu lautele o le atunu’u i totonu, ma ua si’itia ai nei i le 2,443 i latou ua a’afia talu ona sao i tua le fa’ama’i. O lona uiga, e 1,514 le aofai o e o loo a’afia pea i le siama i le taimi nei.

O le toatele o i latou o loo lipotia mai ua toe faafoisia le malosi ma toe manuia, o se molimau foi lea a se tasi aiga sa maua uma i latou i le Koviti. E pesi mai i tua le faamai, ua maea ona fai booster a le tina (59 tausaga) ma le tama (65 tausaga). O le fanau matutua e toalima, ua tailua uma a latou tui (double vaxxed).

“O le toatele o matou, e na o le lua lava aso na lagona ai auga, ae toe te’a. O auga foi e le malolosi tele – o le tiga lava o le ulu ma le niniva, faapea le lagona o le tino vaivai ma le fia taoto, ae lei umi lava ae toe te’a. O lea ua toe malolosi uma le matou fale. Sa matou toaaga lava e inu le vai lega, ma taumafa meaai paleni..”

O le molimau a se tasi tina na avatu o ia i le falemai, ma taoto ai mo ni aso se lua. E le masani ona maua o ia i se gasegase o le tino. O lana molimau, e lua lava foi aso sa lagona ai le tigaina o auga, ae toe matuu ese atu, ma toe faafoisia lona malosi.

O le faamatalaga ua tuuina mai e le Matagaluega, o i latou ia e taua o “active cases” e 1,514 – o loo mafai lava ona pepesi ai le faamai. “An active case is someone who tested positive for covid-19 and can still transmit the virus”.

Mai le 164 fou – e toatasi lava sa aafia mai Savaii, ae o le 163 o Upolu uma. E lei aafia mai lava se tasi i Apolima faapea Manono.

Ua fa’amauina e le Matagaluega o le Soifua Maloloina e 23,419 suega (RAT TESTS) ua faia mo le mamalu o le atunu’u talu ona pepesi i tua le fa’ama’i. E 22,904 suega sa fai i le aso ananafi. O lona uiga, e 515 i latou sa faatino suega, lea e maua mai ai le toa 164 fou lea.

O se pasene lea e 31.84% i latou sa faatino a latou suega ananafi, ae maua atu o loo positive.

E toa sefululua (12) i latou ua aafia i le faamai o loo i le nofoaga fa’anofoesea i le Falema’i i Moto’otua mo le taimi nei.

E pei ona faasalalauina atu i le po anapo, ua faamaonia mai foi e toatasi (1) ua faaopoopo i e ua maliliu ona o le KOVITI-19 – ma ua si’itia ai le numera oi latou ua māliliu ona o le KOVITI-19 i le tooalua (2).

I se Pepa o Faamatalaga na tuuina mai e le Matagaluega o Soifua Maloloina, “O le ua maliu o se matua tausi e 87 tausaga mai le Itumalo o Faasaleleaga 2, Savaii. Sa auina o ia ma taofia ai i le Falemai o Malietoa Tanumafili II i Tuasivi i le Aso Tofi, 31 Mati 2022 ona o le ogaoga o aafiaga o ona ālāea, ma faamaonia ai ua aafia i le Koviti 19, ma ua limonia. E leai ni aafiaga tumau o lona soifua, peitai e le’i faia ona tui puipui o le Koviti 19. E ui i togafitiga faafomai na tuuina atu e Fomai ma Tausi Soifua i Tuasivi mo le tina, na siliga taliiseu ma maliu ai i le taeao nei, Aso Sa 3 Aperila, 2022”.

Ua lipotia mai fo’i e toafa (4) nisi fa’aopoopo mai le faigāmalaga sa taunu’u mai i le Aso 29 o Mati 2022 mai Aukilani Niu Sila ua māua sa a’afia muamua i le siama o le Koviti i atunu’u sa i ai a’o le’i malaga mai, ma ua si’itia ai nei le aofa’i oi latou sa a’afia i le fa’ama’i na malaga mai atunu’u i fafo talu mai Novema 2020 i le 56.

O i latou nei e le’o faitauina o ni gasegase na mua’i a’afia atu iinei ma e le’o faitauina fo’i i le faitau aofa’i o i latou o lo’o a’afia i le taimi nei.

O loo maitauina pea le siisii o e silia mai le 65 tausaga le matutua ona aafia, lea ua 129 i latou i le taimi nei, ae 74 i latou e i va o le 60-64. Talu lava ona pesia lenei faamai i le lalolagi atoa o lea ua lua nei tausaga, o tama ma tina matutua e pito sili ona ogaoga ai aafiaga o le faamai. O lea foi ua toalua e ua maliliu i Samoa, e 69 le isi, ae 87 le isi.

O loo faagasolo pea tuiga o le booster i Upolu, ma ua maea foi ona faailoa mai e le Matagaluega, vaega eseese o le atunuu, e mafai ona faataunuuina ai tui lona tolu, poo booster.

Aso Lua 05 Aperila 2022
1) Manumalo Baptist Primary School
2) Bahai Montessouri Pre School
3) Samoa Adventist Primary School & Agape Pre-School
4) Vaimea Primary School

Aso Lulu 06 Aperila 2022
1) Vaimoso Primary School
2) Marist Brothers Primary School, Mulivai
3) Saint Mary’s Primary School, Savalalo
4) Lepea Primary School
E fautuaina le mamalu o le atunu’u o loo alala i afioaga nei ina ia fa’aaoga nofoaga e pei ona ta’ua i luga e fa’atino ai tui puipui e fesoasoani e fa’aitiitia ai le soona pipisi o le fa’ama’i.

Nofoaga Fa’aopoopo mo tui puipui mo le:

 Aso Lua 05 Aperila, Aso Tofi 07 Aperila ma le Aso To’onai 09 Aperila, 2022, o le a fa’atinoina i nofoaga e o loo taua i lalo.
1. Ofisa o Tui Puipui-EPI Building fa’afesagai ma Seb and Rene- Motootua
2. Faleaoga Fa’apitoa a le Matagaluega Soifua Maloloina – Motootua
3. Health Centre – Matagialalua
4. Falema’i Fa’aitumalo –Upolu