I le maea ai o soalaupulega a le itu a loia ma faamasino i le matāupu a Sui Faipule e toatolu sa faamavae mai le vaega faaupufai a le HRPP, na tuuina mai ai se faaiuga ua malilie i latou e toe fo’i e fai faiga palota laiti ma fesiligia ai finagalo a latou itumalo.
O Ale Vena Ale mai le itumalo o Faleata 4, o Tu’uu Anasii Leota mai Siumu ma Ma’uu Siaosi Puepuemai mai le itulamo o Vaa o Fonoti sa latou finauina, e iai lo latou aia tatau e see ese mai ai i se vaega faaupufai ua latou le toe talitonuina.
Peitai, o lea ua maua i le asō le tali aloaia mai a le Faamasinoga Maualuga e tauala lea i se soalaupulega, o le a toe foi e fai faigapalota laiti.
O le Tulafono o Faigapalota e pei ona finauina, sa mafai lava ona see ese Sui Faipule mai latou vaega faaupufai, ae faaauau pea o se Sui Tutoatasi. Sa mafai ai ona see ese Leatinuu Sooialo Wayne Fong faapea lē ua fai nei ma Palemia le afioga Fiame Naomi Mata’afa mai le vaega faaupufai o le HRPP i le tausaga 2020.
Peitai sa suia lenei tulafono ia Ianuari 2021, ma le toe mafai ai loa ona iai lea saolotoga i Sui Faipule.
I fafo mai o le potu faamasino na faailoa ai e le tofā ia Ale Vena Ale, ua maea ona ia faailoa i lona itumalō e tuu atu o ia ina ia tauvā i lalo o le vaega faaupufai a le Faatuatua i le Atua Samoa ua Tasi FAST.
“I have already declared and ask my constituency and my electorate to let me run under Faautauta i le Atua Samoa ua Tasi FAST, i want to serve our people and to serve our Government.”
Peitai i le saunoaga a Tūu’u Anasi’i Leota na ia faailoa ai ua latou malilie e toe faia palota laiti ina ia faafaigofie ai i lea mo le atunuu.
“E momoli le faafetai i le tapuaiga a Samoa ona e talitonu ua iva nei masina o taligā le atunuu i se faamoemoe mo matou, e tusa ai foi ma matou manatu e finauina lenei tulafono.”
Saunoa Tu’uu sa latou manatu lava e tatau ona faigofie le latou omai i leisi patī agai i le tutoatasi ina ia ‘aua nei saisaitia i latou i faiga vaega faaupufai, peitai, ona o le tulafono lava lea ua malilie ai.
“Aua o le sau mai leisi patī agai i le leisi patī e le fetaui leaga e tele ai fesuiaiga a le faigamalo.”
Na tutusa finagalo a Tu’uu Anasii ma le afioga Ma’uu Siaosi Puepuemai. Ua mautu se la manatu sei o la fesiligia muamua finagalo a lā itumalo poo fea tonu o le ā agai ai i laua ao lei faia faigapalota laiti.
