Ua faamaonia e le Faamasinoga Faaitumalo moliaga o le faaoolima (assault) lea sa faasaga i se faifeau Metotisi.
O Poasa Leaupepe, 68 tausaga, sa muamua lava molia i le fasioti tagata paivalea (manslaughter) pei ona lipotia ia Aperila o le tausaga 2021.
Sa faaoolima Poasa i le atalii ia Sootaga Viliamu i le Aso 4 o Fepuari 2020, ae maliu o ia i le Aso 28 o Fepuari 2020. Sa tuuina mai e faapea, sa maliu o ia i le leukemia. Sa tulai mai lea faalavelave ao tausinuu Poasa i le Ekalesia Metotisi i Safotu.
Peitai o Iuni 2022 sa toe tuuese ai moliaga matuia nei mai le Faamasinoga Maualuga, ae molia loa i le faaoolima – o se moliaga i lalo i le Faamasinoga Faaitumalo.
Sa tuu ese le moliaga o le fasioti tagata pa’ivalea ma le faaoolima tugā (grevious bodily harm) ina ua molimau le fomai sa gafa ma le suesuega, o le kanesa o le toto (leukemia) na mafua ai ona maliu le talavou.
Ina ua tuuina atu lenei mataupu i le Faamasinoga Faaitumalo ia Iuni 2022, sa tulai le faifeau ia Poasa Leaupepe ma ia faapea mai, e na te le fia auai atu i polokalame toefuataiina a le Faamasinoga (rehabilitation programmes).
I tolaulauga o le Faamasinoga ao suesue molimau, sa faaalia ai foi e le faifeau ni uiga taufaafefe i se tasi o molimau.
Sa saunoa le Faamasino ia Alaalatoa Rosella Viane-Papalii i upu tuu sa’o i le faifeau. O le matau a le Faamasino, ua manatu le faifeau ia Poasa o ia e le mafai ona oo atu iai se malosiaga a le tulafono.
E foliga mai e te manatu o oe ua e maualuga atu nai lo se isi lava..”
“My perception of your general conduct is it portrays the impression that as a church minister, you believe you are untouchable. it appears you value this position above all else and that by that token, it elevates you to a higher level.”
Sa tuuina atu e lana afioga ia Alaalatoa le ono masina e nofo vaavaia ai faapea le 60 itula e faigaluega fua ai e aunoa ma se taui, poo le faatino o galuega lelei (community service).
I folasaga mulimuli a loia o loo tulai mo Poasa, na tatalo ai i le Faamasinoga ina ia faapafala se faasalaga e aunoa ma le faamaonia o se solitulafono (discharge without conviction).
Sa talosaga foi leoleo i luma o le faamasinoga, ina ia faamaonia moliaga ae faapafala se faasalaga.
Peitai, e lei talia e le tamaitai Faamasino ia talosaga, ma ia tuuina mai ai le faasalaga e pei ona iai nei.
