Aso 19 Setema 2023 Apia Samoa. O le afiafi nei na faalauiloa ai e le Peresitene o le Lakapi Liki a Samoa, le tofa ia Fiu Ponifasio Vasa, le faiaoga taiulu (head coach) a le Toa Samoa.
Ua tofia nei le susuga ia Ben Gardiner, na te tauavea le au lakapi liki a le atunuu, e sui ai le afioga ia Mauopule Matt Parish sa avea ma faiaoga le Toa Samoa mo tausaga e tele.
Saunoa lePeresitene, e toafitu i latou mai atunuu mamao sa tusi talosaga mo le avanoa. O nisi sa talosaga mai e iai le tomai faaleva-o-malo (international), ae e leai se isi i totonu lava o Samoa sa talosaga.
Na faamanino foi e le tofa ia Fiu, “Na filifilia Ben, ona o loo maitauina o loo tele se agavaa o loo ia te ia, ae o se tasi foi o loo ausia e lana au poo le kalapu o loo galue ai le fa pito i luga o le taamilosaga a le NRL, ae o se tasi foi e lava lana fesootaiga i tama o le Pasefika.”
O le susuga ia Ben ua filifilia nei, o loo avea ma faiaoga lagolago a le kalapu o le Panthers, lea o loo tele alo ma fanau Samoa o loo ta’aalo ai e pei o Jerome Luai, Brian Too, Stephen Critchon ma nisi.
Sa avea foi o ia ma faiaoga lagolago o le au lakapi liki a Niu Sila, le Kiwis, i le 2017 ma o ia foi o se tama fanau a Niu Sila.
Saunoa Fiu, o loo iai le faamoemoe e tuufaatasia le tatou Toa Samoa i le amataga o le masina fou, ae le’i amataina le taamilosaga ua faaigoaina o le Pacific Championship, lea e aofia ai Ausetalia, Niu Sila ma le Toa Samoa.
