Tumau pea le Tetee atu o le Faifeau i Moliaga o loo Tuuaia ai e Nisi o le Ekalesia

"o lenei faafitauli ua fai ma tulaga ua vā ai le fogavaa i le lotoifale a le aulotu.."

0
4778
The Lands and Titles Court side of Mulinu’u Courthouse.

O le vaiaso nei sa toe tulai ai i luma o le Faamasinoga Maualuga lē sa avea ma faifeau o le Ekalesia Faalapotopotoga Kerisiano Samoa i Savaia-Tai.

O loo faaauau pea le tetee atu a le Susuga iā Clay Tofilau i moliaga uma e lima o loo faasaga ia te ia, e uiga i le fa’aaogaina o tupe a le Ekalesia.

Na mūa’i valaau lenei mataupu iā Aukuso 2023, ma sa teena ai fo’i e le susuga i le faafeafaiga moliaga uma, e tauala atu i lana loia iā Leiataualesa Komisi Koria.

Sa tuuina mai e le Faamasinoga le Aso 26 o Fepuari e iloiloina ai lenei mataupu, peitai, ina ua toe valaau i le vaiaso nei, na toe faatulaga mai ai le masina o Aukuso 2024.

I faamaumauga a le itu a leoleo e tusa ai ma le tagi na tuuina atu e nisi o le Ekalesia, o se taimi na sii ma’i ai le faletua i atunuu mamao, lea e tula’i mai ai tuuaiga faasaga i le faifeau.

O lenei mataupu e pei ona faasoa mai ai se tasi o tamā o le Ekalesia e le’i manao e faailoa lona suafa, o lenei faafitauli ua fai ma tulaga ua vā ai le fogavaa i le lotoifale a le aulotu, ina ua momoli e nisi o aiga o le Ekalesia lo latou faifeau i le tulafono.

“Ma ua lē maua ai se nofo filemu.”

Na toe molimauina fo’i le faatumulia o le potu faamasino i sui o le Ekalesia EFKS mai Savaia.

O i latou e lagolagoina le faifeau atoa ma i latou na moliaina le faifeau i luma o le faamasinoga.

Ua faatulaga mai e lana afioga iā Fepuleai Ameperosa Roma le Aso 5 o Aokuso e suesue ai mau o lenei mataupu.

O loo tatala nei i tua le faifeau i aiaiga masani e saini ai i le ofisa o leoleo, ao tālia le aso o le Faamasinoga.