Faamatuu atu Vaega Muamua o le Poloketi Miliona mo Itumalo e 3 ua Ausia Aiaiga Uma

0
191
Three more districts receive $160k for operational staff wages.

O le taeao o le Aso Tofi 29 Fepuari sa faatautaia ai i le Tooa Salamasina le sauniga o le sainigalima a le Malo o Samoa ma Fono Faavae a Itumalo e 3 mai Upolu ma Savaii mo le Poloketi o Atinae o Itumalo. 

  1. Vaisigano 1
  2. Satupaitea
  3. Faasaleleaga 1

I le maea ai o iloiloga o ripoti a suetusi i le faaogaina o le $1,000,000 muamua, ua pasia aloaia ai e le Komiti Faafoe (Steering Committee) i lana fonotaga i le Aso 27 Fepuari 2024, le faasaini’ina o maliliega mo le miliona lona lua (FY 2023-2024) ma le faamatuuina atu o le $160,000 (16%) mo le faagaioioina o Ofisa o Fono Faavae a Itumalo.

O Afioga i Faipule, Sui Taitaifono ma Failautusi o Fono Faavae, na fai ma sui o Fono Faavae o Itumalo uma e 3 e faatinoina le sainigalima.

Na saunoa le Afioga i le Minisita ia Mulipola Anarosa Ale Molioo e fai ma fofoga o le Malo, e faafetaia le onosaia ma le lava papale o Fono Faavae a’o faagasolo faatinoga e tatau ona faatino ma momoli le finagalo o le Malo e faamalosiau ma fautua i Fono Faavae a Itumalo uma ina ia tutu faatasi e lagolagosua i Taitaifono mo le faatinoga o lenei poloketi taua.

O le vaiaso nei sa tuuina mai ai se Pepa o Faamatalaga a le Taitaifono o le Poloketi a le Itumalo o Faasaleleaga 2, le afioga ia Magele Sekati Fiaui o ia foi o le Minisita Lagolago o Tupe, e faamanino ai na te le’i fa’aaogaina se seleni o le Poloketi mo le Itumalo.