Tolopo Iloiloga o le Fasioti Tagata ona o le Leai o se Resitala e Agavaa

0
126

Ua toe tolopo nei e le afioga i le Fa’amasino o le Faamasinoga Maualuga le Afioga ia Leiataualesa Daryl Clarke le fa’atautaia o taualumaga o se mata’upu taua o se iloiloga (assessor trial) e aofia ai moliaga o le fasioti tagata fa’amoemoeina, ona o lona talitonuga ua leai se resitala sinia e iai agava’a na te fa’aliliuina fa’a Samoa taualumaga o lenei mata’upu, ina ia malamalama ai le laulau o Fa’atonu (Assessors).

O le alii o Faranisisi Molia mai Tufuiopa ma Lotopa o loo moliaina foi i le

fasioti tagata pa’ivalea atoa ai ma le fa’ao’olima ma le umia o se aupega matautia. 

Na sauni uma loia o le itu a leoleo faapea lē o loo tu mo Faranisisi. Ua nofoia foi le laulau o Faatonu e toalima, faapea ma lē ua molia ia Faranisisi.

Sa saunoa le Alii Faamasino, o ia ua sauni mo le fa’atautaia o lenei mataupu peitai, e tatau ona ia toe tolopoina ona o lona talitonuga, e mana’omia se resitala sinia ua iai le agava’a atoatoa e mafai ai ona fa’aliliu taualumaga uma o lenei mata’upu taua, ia fa’apea ona malamalama iai fa’atonu e to’alima lea ua fuafua e latou te iloiloina lenei mata’upu ma faia sona fa’ai’uga.

Sa taua e Leiataualesa o lenei faafitauli sa tatau ona faia iai se faatatau a le Pulega o le Matagaluega o Fa’amasinoga (MJCA) ona ua maea ona tuuina atu iai le fautuaga ma le tuualalo a Alii ma Tamaitai Faamasino.

E tatau ona tofia ni resitala sinia e mafai ona ia fa’atinoina lenei galuega taua mo lenei mata’upu ua leva na tatau ona fa’atautaia lona iloiloina ma e o’o mai le taimi nei e le’i maua mai se tali o lea tusi a lana afioga i le Fa’amasino.

Ina ua fesiligia le Pule Sili o le Matagaluega o Faamasinoga, le Susuga ia Moliei Simi-Vaai, na ia taua ai, o loo iai le tomai ma le agavaa i Resitala uma. Na ia faapea mai foi, e tusa lava ma tulaga masani o soo se fale faigaluega, e tuua lava e nisi galuega ma o atu e sue a latou lumanai i isi foi atiinae ma laasaga o le olaga.

“O le tolopoina o lenei Faamasinoga, o le pule faitalia lava lena a le Alii Faamasino”.

O le lua vaiaso ua mavae atu nei na fa’amavae aloa’ia ai le se tasi o Resitala Sinia a le Fa’amasinoga Maualuga, le afioga ia Veatauia Fa’atasi Puleiata. O Veatuia o se tasi ua loa tausaga o ia fa’atinoina lenei galuega i mata’upu ma’ale’ale e pei o feusuaiga, ma faamatalaga a fomai faapitoa mo iloiloga uma e mana’omia ai lona fa’aliliuina i le gagana Samoa. 

Sa taua e Leiataualesa le tāua tele o le malamalama o Fa’atonu i le faaliliuina o faamatalaga, faapea foi saunoaga autu a loia o itu uma o le mataupu, ae maise foi faamatalaga autu a le Faamasingoa e uiga i mataupu e o loo suesueina. 

O le taimi nei e o’o atu i le 7 Resitala a le Fa’amasinoga Maualuga o lo’o nafa ma lenei auaunaga taua o le fa’aliliuina o taualumaga o le fa’amasinoga ma e to’atolu lea ua fa’amavae e aofia ai ma le afioga ia Veatauia.

Sa taua e Leiataualesa i lana folasaga, e na o le tasi lava le Resitala e na te talitonuina o loo iai le tomai ma le agavaa e faaliliuina mataupu maaleale e pei o lenei faamasinoga, e tele moliaga matuia o le a iloiloina.

“A toesea la lenei Resitala e toatasi, pe gasegase foi, o le a aafia tele iloiloga o mataupu faapenei”.


Marieta H Ilalio