Toe tula’i foi Afualo Daryl Mapu i luma o le Faamasinoga i moliaga tau fualaau faasaina

July 30, 2025

981

Ua toe tula’i fo’i le sa avea ma Komesina Lagolago o le Ofisa o Faigapalota ia Afualo Daryl Mapu i luma o le Faamasinoga i lenei vaiaso. O

O Afualo sa faamaonia moliaga e 6 ia Setema 2022 e fesootai i le uumia o fualaau faasaina faapea laau malosi [possession of the narcotics, utensils, firearms and ammunitions].

I taualumaga o le Faamasinoga i le vaiaso nei na talosaga ai le itu a leoleo mo se isi taimi faaopoopo seia faamautu mai a latou moliaga.

Na talia e le afioga ia Fepuleai Ameperosa Roma le talosaga ma ua faatulaga ai le Aso 4 Aukuso e toe fofogaina ai lenei mataupu.

I faamaumauga a le itu o leoleo, o le lua vaiaso talu ai, na toe taofia ai Afualo Daryl i se osofaiga a leoleo i lona maota.

O le mau a leoleo, sa maua atu o loo ia uumia se papa iila o loo iai fualaau faasaina o le aisa e tusa ma le 66 kalama. Sa maua ai foi se laau malosi, o ututau e le faatagaina, o se paipa poo se mea faitino e faamoemoe e faatino ai le ulaina o fualaau faasaina.

Sa tuuina atu e le Faamasinoga Maualuga se faasalaga falepuipui e 18 masina ia Afualo ina ua faamaonia ona moliaga muamua, lea sa maua atu ai le 1.6 kalama o le aisa i lona ofu vae sa fai (sei tulou).

Peitai, o lea ua toe maua fo’i Afualo, ma ua siitia atu i le 66 kalama lea o loo tuuaia ai.

O le taeao lava lea sa maua ai e leoleo Afualo, Aso Gafua 14 Iulai 2025, na latou osofaia ai foi se maota o se aiga i le su’eina o Daryl.

O lea sa faaali ai le le fiaifa o le tina ia Fuaesi Jean Afualo ma tuuaia leoleo i le latou osofaia sese o le latou maota i le 5 i le vaveao, ma ta’i fana agai i lana fanau iti faapea lona tama matua.

Peitai, o loo teena e leoleo lena faamatalaga, e ala mai i le Afioga i le Komesina ia Auapaau Logoitino Filipo, sa ia faapea mai, e leai se tasi o le aiga na ta’i pe fa’au iai se laau malosi i lena taeao.

Saunoa fo’i Auapaau, o le aiga lea sa osofaia, e aiga lelei ia Afualo, ma o le maota lea sa maua ai se faamatalaga i suesuega, na faaaoga mo le fefaatauaiga o fualaau faasaina o le aisa.

O loo faaauau pea ona nofo taofia Afualo Daryl i lalo o vaavaiga a leoleo seia talia le Aso 4 Aukuso e faamautu mai ai moliaga fou a leoleo ae o se avanoa foi lea i lana loia le susuga ia Quentin Sauaga, e tuuina atu ai talosaga masani mo le tatala ai o ia i tua.

Vacancies