I lenei vaiaso ua faamauina ai i le Ripoti 15 a le Matagaluega o le Soifua Maloloina i totonu o le vaiaso 21-27 Iulai 2025, o loo maitauina pea le faatupulaia o le numera o le atunuu ua aafia i le fiva ponaivi.
E tusa ma le 521 le numera sa mafai ona faaamaonia mai mo lenei vaiaso. Ae ua tusa ma le 2,277 le aofai o i latou ua aafia talu mai le masina o Ianuari 2025.
O loo faaauau pea galuega faa le Soifua Maloloina o loo ripotia ai galuega sa faatinoina aemaise o le fanaina o aoga ma nofoaga o le itu taulaga, Faleata, Sagaga ma Aaana.
O lea polokalame faapitoa o loo faatinoina mo aoga o loo tuufaatasia e le NEOC ameasie le taitiaga a le Matagaluega o Aoga ma Aganuu. O loo faasolo foi lenei polokalame mo Nuu ma Alalafaga e pei ona taitaina e le Matagaluega o Tina ma Tamaitai Atinae o Nuu ma Agafesootai.
I le tolu vaiaso talu ai, sa 331 i latou na faamauina ua aafia i le vaiaso e tasi. I le vaiaso na mavae atu nei, e 498 le aofa’i i le vaiaso, ae o lea e faatupulaia pea le numera ma ua oo atu i le 521 i le vaiaso nei [Mon 21 July – Sun 27 July].
O se siitia maualuga lea aemaise lava o le Falemai tutotonu o Tupua Tamasese Meaole i Motootua.
O loo faaauaua foi polokalame ma auaunaga a le Soifua Maloloina i faalauiloa ma polokalame faaleaoaoga i nuu ma itumalo e tauala atu lea i le Matagaluega o Tina ma Tamaitai Atinae o Nuu ma Agafesootai.
Ua faaiugafono fo’i e le Kapeneta le aloaia o le toe tatala o le Komiti faafoe o loo gafa ma Faalavelave Faafuasei, le NEOC faapea foi le HEOC – ae taitaiina e le Pule Sili Lagolago a le Matagaluega o Soifua Maloloina, Tagaloa Robert Thomsen.
