Lolomiina 1pm Aso Faraile 18 Iulai. Updated: 7pm.
“E na o le fe’ei o la’u masaga teine ta’i tolu tausaga i le fefefe a’o taoto si ou tamā matua 69 tausaga o loo ma’i.. ae o loo feoa’i leoleo o loo fai latou ofu army i totonu o le matou fale ma faalālā mai fana e tapuni ai matou gutu.”
O le faasoa mai lea o le tinā ia Fuaesi Jean Afualo, 33 tausaga o lona soifua mai Fogatuli, ina ua ulufale faafuasei leoleo o loo faa’aupegaina i laau malosi i totonu o le latou fale i le 5 i le vaveao o le Aso Gafua i le amataga o lenei vaiaso.
Sa le manao le tina e pu’e ni a latou ata, ae na o ata o le fale o le latou aiga, lea ua fai mai leoleo, o le isi lea nofoaga sa faatau ai fualaau faasaina a Daryl Mapu.
Saunoa Fuaesi, o ia sa sii lana pepe ua tolu vaiaso le matua, o loo tau faamoe i le taimi na osofaia ai latou.
“Ae ou te’i i lou vaai atu e tolu taavale ua agai atu i totonu o le matou pa..
“Sa ou vaai atu ua tulioso i lalo le tagata ma aga’i mai, ma ua salue le faitotoa..
“Na ou tu mai i luga ma tatala le faitotoa ae ou faalogoina loa le leo o faapea mai ou te nofo i lalo, ma aua lava nei o’u toe minoi..”
“Na matala le faitotoa ma ulufale mai i totonu leoleo.. ma tu’u mai le fana i o’u foliga e tapuni ai lou gutu..
“Ua feala uma le matou aiga, ma ua feei ma fetagisi la’u fanau i le fefefe – faatoa vaai la’u fanau i se vaaiga faapea..”
Faasoa le tina ia Fuaesi, sa iai fo’i lona uso i le fale, e le’i atoa ona lavalava ona o la sa momoe. Sa faanofo i le tulimanu o le fale ma ta’i iai le fana e faasa ai ona toe migoi, ae e lē o lelei ona lavalava.
Sa faapea atu le isi leoleo, “O fea Daryl Mapu?”
“Sa ou fai atu, ou te leiloa lenā tagata..”
“Na saili solo i totonu o potu ma le matou fale atoa, e le’i maua se tagata ese lea na saili mai..”
E faasoa mai lenei tinā i se faalatanoaga ma le Samoa Global News, ae o loo taoto lona tamā matua, o loo gasegase o ia.
O le faamatalaga a Fuaesi Jean Afualo, sa faapea atu se tasi o leoleo ma finau atu ia te ia: “O lea ua maua tui i totonu o le fale, o tui nei e faaaoga i fualaau faasaina o le aisa..”
“Sa ou finau atu iai, o tui a si ou tamā o le ma’i suka, ma e leai se isi o matou e faaaogaina ni fualaau faasaina.”
Saunoa Fuaesi, “O le mae’a lava o latou sailiga, o le a o ese ma le matou fale, fa’atoa tuuina mai ai se Pepa mai le Faamasinoga sa sainia i le Aso 18 Iuni – o loo sailia ai le tagata e suafa ia Daryl Mapu.”
Tā’ua e Fuaesi, o le a le mafai ona galo ia te ia lea taeao ma le mea sa oo iai le latou aiga.
“Ou te ofo i le lē vaai alofa i si a fanau faapea si ou tamā o loo faataotolia i ma’i o le tino..”
O Faumui Afualo Daryl Mapu sa faamaonia lana solitulafono i le uumia o fualaau faasaina o le aisa, uumia laau malosi e le faatagaina, faapea foi le uumia o ututau e le faatagaina ona faaulufale mai i Samoa.
O Iulai 2022 na faamaonia ai ona solitulafono, ae o Novema 2022 na tuuina mai ai le faasalaga mo le tausaga ma le ono masina i le falepuipui.
O Daryl Mapu sa avea ma Komesina Lagolago o le Ofisa o Figapalota, ma o ia o se alo e faasino i le afioga i le Fofoga Fetalai o le Maota ia Papalii Lio Masipau.
Ua saunoa le Komesina o Leoleo, e leai ma se fana poo se laau malosi na ta’i i se isi o le aiga.
O le Search Warrant mo Daryl Mapu, sa aofia ai ma le fale o le aiga lea.
“E aiga lelei le aiga lea ma Daryl ma o le isi lea nofoaga sa faatau ai e Daryl le aisa.”
Saunoa Le Komesina, e lē sa’o le tuuaiga a le tina ia Fuaesi Jean Afualo o loo faapea mai ai sa ta’i laau malosi i nisi o le aiga ae maise le fanau.
Sa maua lava i le taeao lena o le Aso Gafua Daryl Mapu i le isi nofoaga i Nuu Fou. Sa ia uumia le aisa 66 kalama, ma ua toe taofia nei ia e leoleo.
Ua faailoa e le tuaā o le toalua o Fuaesi, o Tagaloa Uelese, o le a agai lo latou aiga e sue se fautuaga faaletulafono.
“O le a saili se fautuaga faaletulafono e toomaga iai lo matou aiga i lenei mataupu.”
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
