E iva tino maliu o le a faia iai ta’otoga a se fomai faapitoa mai Fiti, e aofia ai se tinā sa maliu mai le aiga o lona toalua ma o loo masalomia na maliu ina ua faaoolima iai se isi.
I le feiloaiga a le Sui Komesina o Leoleo ma Falepuipui ma ofisa faasalalau, na faamaonia mai ai e Papalii, o tino maliu e iva, o loo aofia ai ma se tinā e 49 tausaga mai le afioaga o Siumu ma Salailua.
O lenei tinā sa maliu mai i le aiga o lona toalua i Fasitoo-Uta.
Saunoa Papalii, i suesuega a leoleo, o māua ai le tele o manu’aga i foliga o lea tina aemaise se una’oa o loo i lalo o lona auvae.
“O loo iai masalosaloga sa faaoolima iai se isi, ae o le a saga faamautu mai pe a ma’ea le ta’otoga faapitoa i le tino maliu o lea tinā..”
Saunoa Papalii e lei molia se isi ona o lea faatoa lipoti mai i totonu o le Ofisa le mataupu.
O le weekend lea na te’a atu nei sa tupu ai le faalavelave, ae faatoa lipotia mulimuli mai i le ofisa o leoleo.
“O le aiga i Siumu na lipotia maia i leoleo le faalavelave ae o Fasitoo Uta e nofotane ai le teine..”
Sa faigaluega lenei tinā i le Digicel. O ia sa fai ma latou Reception.
Saunoa foi le Sui Komesina, “O loo ua ma’ea foi ona tuuina atu le talosaga mo se faatagana e mafai ai ona faia se ta’otoga i le tino maliu o se alii 31 tausaga lea sa soli e se taavale i le vaveao o le Aso Toanai na sei mavae atu nei.
Afai ae talia lea talosaga lona uiga e atoa ai loa le 10 o tino maliu o le a faia iai taotoga faapitoa.”
Saunoa Papalii, “O le afiafi nei e taunuu ai i le malae vaalelel i Faleolo le fomai mai Fiti, lea o le a faamoemoe na te faatautaia ta’otoga o maliu.”
O le aso 23 o le masina nei o le a toe tuuvaaese atu ai le alii fomai fai taotoga faapitoa ma Samoa.
