Ua molia e leoleo se tamaitai 32 tausaga o Salelologa ma Sapapalii i le ave taavale faatamala ua maliu ai se alii sa moe i autafa o le auala.
Saunoa le Sui Komesina o Leoleo, Papalii Monalisa Tiai-Keti, e tusa ai ma suesuega a leoleo, o le 3 i le vaveao o le Aso Toanai na sei mavae atu nei na tulai mai ai lenei faalavelave.
“O se alii 31 tausaga o Lalomalava, sa moe i autafa o le auala, ae soli ai o ia e le taavale.”
Saunoa Papalii, “ua molia lenei tamaitai i le moliaga o le ave taavale matautia ua oo ai le maliu se isi tagata (dangerous driving causing death).
O loo tatala nei i tua lea tamaitai i lalo o tuutu’uga ma aiaiga e saini i le ofisa o leoleo Tuasivi i Aso Lulu ma Aso Faraile o vaiaso taitasi, e tālia ai le Aso 6 Fepuari e tulai ai luma o le faamasinoga e tali ona moliaga.
Na tāua foi e Papalii, o loo faasolo suesuega a le Matagaluega i se faalavelave na tulai mai Safaato’a Uta, lea na aafia ai ni tamaiti I se faalavelave tau taavale.
E lei tuuina mai nisi faamatalaga ae peitai ua aumai se tuualalo a le Matagaluega e tauala mai le Sui Komesina mo i latou uma e faafoeina soo se sā, ina ia faafoe ma le saogalemu, faafoe ma le faaeteete, ma ia silasila ma le toto’a, aua le saogalemu o le mamalu o le atunuu feafifioa’i.
