Sao Mai Le Falepuipui se Alii Talavou Ua Faamaonia le Umia o se Aupega Matautia e le Faatagaina Faaletulafono

"O le maitau o le Faamasinoga, e tele se aafiaga o lou olaga talavou pe afai e tuuina atu se faasalaga falepuipui."

0
7723
Treavor Pitonuu Aloese

Ua sao mai le falepuipui se alii talavou 22 tausaga ua faamaonia ona moliaga e lua, o le uma lea o se aupega matautia, faapea le umia o se aupega e le faatagina faaletulafono.

O Treavor Pitonuu Aloese mai Faatoia, ua ia ioeina moliaga e lua a le itu a leoleo.

I le sauniga o lana Afioga ia Loau Donald Kerslake i le tuuina mai o lana faaiuga, “Ua manatu le Faamasinoga a tuuina atu se faasalaga faafalepuipui, e le o se tulaga lelei lea mo oe e te aoaoina mai ai i se lesona aoga. Peitai, ua tuu avanoa le Faamasinoga mo se auala e maua ai se isi amataga fou o lou olaga. O le maitau o le Faamasinoga, e tele se aafiaga o lou olaga talavou pe afai e tuuina atu se faasalaga falepuipui.”

“O le moliaga o le umiaina o se aupega matautia o lona faasalaga e $300, e tatau ona totogi lea tupe ae lei taina le 12 i le aoauli o le Aso Faraile 22 o Tesema. A leai, o le a nofo sala i Tanumalala mo le valu vaiaso.”

“O le moliaga o le umiaina o aupega e le faatagaina faaletulafono, ua faamauina ae o le a fautuaina oe, e aua nei e toe aafia mai se isi lava soligatulafono i totonu o le isi ono (6) masina o muamua atu. E mafai ona toe foi le Faamasinoga i se isi faaiuga pe afai e toe molia mai oe i totonu o le ono masina.”

I faamaumauga o le Faamasinoga, o Treavor o loo iai moliaga o loo tulai i luma o le Faamasinoga Maualuga, e pei ona molia faatasi ai ma Semisi Aliimatfitafi ma Iakopo Ah Him.

O loo tuuaia Treavor le iai o lona sootaga i le faalavelave lea na maliu ai se tama talavou mai Taufusi, faapea se sootaga o fualaau faasaina o le aisa.

E sefulu ma le tasi vaiaso o loo iai faamaumauga o le Faamasinoga na tuli ai foi sona faasalaga i le falepuipui.