Ua Poloaina e le Faamasinoga o Fanua ma Suafa Aiga Tuanai ina ia Tuua Fanua o Afega

0
2240

E fa masina ua poloaina le faamasinoga Fanua ma Suafa e tapena ese ai aiga o le afioaga o Tuanai o loo nofoia eleele o le afioaga o Afega.

E amata mai i le aso na tuuina mai ai le faaiuga o le Faamasinoga o Fanua ma Suafa, e amata tau ai le fa (4) masina ua poloaina ai e le Faamasinoga le tapena ese o aiga o le afioaga o Tuanai o loo aumau ma galueina fanua o le afioaga o Afega.

O le faaiuga lea o le Faamasinoga na tuuina mai ananafi.

I le fofogaina o le faaiuga e faapea, “Ua teena e le Faamasinoga le talosaga o le afioaga o Tuanai ina ia faia se tuaoi i fanua o loo tuaoi ai eleele o Afega ma Tuanai.”

O le mafuaaga o le teena o lenei talosaga ua manatu le Faamasinoga e le alaga tatau ona toe tagofia se isi laulau o faamasinoga i le faaiuga e pei ona faia i le 1963, ma o le faaiuga o le 1963, e faatumauina pea lona aloaia.

O le faaiuga, “Ua tuuina atu le fa masina e tapena ese ai aiga o le afioaga o Tuanai mai fanua o Afega, e amata atu nei aso (14 Tesema 2013) ua tuuina atu le poloaiga ona faitau masina e fa seia maea i le masina o Aperila 2024.”

O se faaiuga e lei faigofie ona talia e le afioaga o Tuanai, aemaise o le maitau o le afioaga o Tuanai, o le tofi faipule o le itumalo o Sagaga 2, le Susuga ia Maulolo Tavita Amosa o loo taitaia mai le itu Afega.

I fafo mai le potu faamasino na faalogoina ai le iuleo, na manatu e malu Tuanai i le faipule.

O Tuanai o leisi nuu o le itumalo o Sagaga 2, e pei ona iai afioaga o Malie, Afega ma Tuanai. Na molimauina ai le lagolago malosi o Tuanai i le Susuga ia Maulolo Tavita Amosa ua tulai mai nei.

E lei finagalo Maulolo e tuuina mai sona finagalo ina ua fesootai iai i lana telefoni.