Talosaga se alii o loo tuuaia i le fasioti tagata faamoemoeina, mo se loia e tulai mo ia

0
3005
Semisi Alii Matafitafi

Ua talosaga se alii o loo tuuaia i le fasioti tagata faamoemoeina, se loia e tulai mo ia.

O Semisi Aliimatafitafi, mai le afioaga o Matautu ma Falelauniu, o loo tuuaia i le maliu ai o se alii talavou mai le afioaga o Taufusi, i le masina talu ai.

Sa faasalalau e leoleo se ata e sailia ai Semisi ina ua uma atu le faalavelave lea sa maliu ai le talavou mai Taufusi ina ua tagatavaleina i se laau malosi.

Check these out at SOS Togafuafua or Salelologa.

Na tulai Semisi mo le taimi muamua i luma o le afioga i le Faamasino ia Niava Mata Tuatagaloa, e tali atu i ona moliaga i luma o le Faamasinoga Maualuga i le amataga o le vaiaso nei.

I taualumaga o lenei mataupu, na talosaga ai le Ofisa o le Loia Sili (Prosecution) ina ia tuuina atu se vaiaso se tasi se’i faamautu mai ai moliaga a le itu a leoleo.

Peitai na saunoa le tamaitai faamasino, “tou te talosaga mai nei i le vaiaso e tasi, uma le tasi o le vaiaso ae toe talosaga mai i le isi lua vaiaso, ae ua leva na taofia e leoleo le tama o loo tulai..”

Sa tula’i foi Semisi ma ia tuuina mai sana faamatalaga i luma o le Faamasinoga. Sa saunoa Semisi i le tamaitai Faamasino, o ia e fia maua sana loia e tula’i mo ia.

O le mau a lē ua molia, ua fiu e talosaga i leoleo o le falepuipui e avatu se lisi o loia ma ā latou telefoni sei saili ai ma faatalanoa sana loia.

“Peitai e mumusu.”

O le mau a Semisi, o loo faasa foi e leoleo ona o atu lona aiga e asi ia i le falepuipui.

Na saunoa Niava, “O le a poloaiina le itu a leoleo, e faaoo atu le poloaiga a le Faamasinoga, e ave ifo ai lisi a loia ma a latou telefoni, sei saili ai se loia a Semisi.”

Ua faatulaga ai nei e lana afioga ia Niava Mata Tuatagaloa le masina fou e toe fofogaina ai lenei mataupu.

E tatau fo’i ona oo atu i lea aso, ua mautu moliaga a le itu a leoleo, ma ua tatau ai foi ona tulai se loia mo lē ua tuuaia.