I’uga o le Apili: E Lē i Lalo ifo o le To’aono Tina Faipule e Mana’omia mo le Palemene o Samoa

0
1821

O le aoauli o le Aso Lulu lea na fofogaina ai se i’uga a le Fa’amasinoga o Apili e pei ona ta’ita’ia e le Afioga i le Peresetene o Fa’amasinoga Apili, le Afioga i le Fa’amasino Sili, Satiu Simativa Perese atoa ai ma le lagolagosua a le Afioga i le Tama’ita’i Fa’amasino o le Fa’amasinoga Maualuga ia Tafaoimalo Tologata Leilani Tuala-Warren ma le Afioga ia Fepuleai Ameperosa Roma.

O itu taua na tu’uina mai i lenei fa’ai’uga o le Apili e pei ona tu’uina mai, e le’o mafai ona fa’aaogaina ai le tofiaina o Aliimalemanu Alofa Tu’u’au e avea ma faipule tama’ita’i fa’aopoopo e pei ona sainia e le Ao o le Malo i le masina o Aperila (void).

Peita’i o lo’o iai pea agava’a mo Aliimalemanu e mafai ai ona manuia ma avea ma faipule tama’ita’i fa’aopoopo mo le paea’iga lenei o le Palemene pe a fa’apea e mae’a palota laiti ma tagi o faiga palota (petitions) e leai se tama’ita’i e fa’amanuiaina ai.

O le isi itu taua e tatau ona silafia e le ‘au faitau, e to’atolu faipule tama’ita’i lea o lo’o a’afia i tagi o faiga palota (petitions) fa’apea ai foi ma tagi fefa’atauagai (counter petitions) ma o i latou nei lea na manuia mai ma filifilia e o latou itumalo i le maea o le faiga palota tele a le atunu’u i le aso 9 o Aperila, 2021.

O lenei fa’ai’uga i lona aotelega o lo’o fa’ata’atia mai ai le tatau lea ona le i lalo ifo o le 10% tina faipule i le fono usu a le Palemene o Samoa, ae to’aono (6) e manaomia e ausia ai lenei pasene.

E pei ona fofogaina e lana Afioga ia Satiu, o lo’o fa’ailoa mai i lenei fa’ai’uga, le tatau lea ona fa’atalia le faaogaina o se sui a faipule tama’ita’i lona 6 mo le Palemene pe a maea ni faiga palota laiti e fa’atinoina (by-elections). Afai e atoa ai iina le to’aono o sui faipule tamaitai, o lona uiga, e le iai se isi avanoa mo le tina o Aliimalemanu Alofa Tuuau, o le sa finaunina malosi lenei mataupu i luma o le Faamasinoga.

O lona uiga e tusa ai o le faai’uga o le Apili e pei ona tu’uina mai e fa’auiga ai le Vaega 44(1A) o le Fa’avae o Samoa, o le a iloa tino se faipule tama’ita’i lona 6 pe a mae’a faiga palota laiti. A maea palota laiti e le atoa lava le to’aono, ona faaoga loa lea o le tatou Vaega 44(1A), ae a maea faigapalota laiti ua to’aono pe sili atu foi tina e tulai mai, o lona uiga e le faaogaina le Vaega 44.

O le isi foi itu e manatua, o le tina e tulai mai pe afai e faaoga le Vaega 44, o le tina e pito sili ona tele ana palota i le fua tau pasene o palota atoa (percentage of total votes).

O le Afioga ia Aliimalemanu Alofa Tu’u’au, sa ia tulai malosi mai e finauina lenei mataupu, lea ua maua nei le faaiuga, e tatau ona i lalo mai o le to’aono tina i le Palemene o Samoa.

O le i’uga tusitusia o lenei Apili e pei ona fofogaina e le Afioga i le Peresetene o le Fa’amasinoga o Apili ia Satiu Simativa Perese o le a maimoa mai iai i lona fa’a Peretania i luga o le tatou website a le Samoa Global News fa’apea ai ma le itulau o le Facebook i se taimi o le aso.


Marieta H Ilalio