Vevesi le Maota Fono i Tuuaiga o le ‘Conflict of Interest’

"O le ā lau mea na fai Tuilaepa? Pule lou atalii i tupe ae Palemia oe, o se mea a le tou aiga?"

0
1708

O le vaiaso nei sa faafofoga ai le atunuu ao siisii le tai i manatu faaalia i le va o le Taitai a le Itu Agai ia Tuilaepa Sailele Malielegaoi, ma le Minisita o Faatoaga ma Faigafaiva o le Taitaifono fo’i o le Faatuatua i Le Atua Samoa ua Tasi (FAST) ia Laaulialemalietoa Leuatea Polataivao Schmidt.

Sa mafua le vevesiga ina ua tulai Laaulialemalietoa e faasa’o ma faatu se lafo e aveese mai ai i faamaumauga a le Palemene, se vaega o le saunoaga a Tuilaepa sa ia tuuaia ai le Pule Sili o le Matagaluega o Soifua Maloloina i le “conflict of interest”.

[Conflict of Interest  – feteenaiga o aia poo fesootaiga. O le iai lea o se tulaga e te fesootai ai i ni tagata poo ni pisinisi poo soo se mea lava, o loo galulue vavalalata ma le galuega o loo e uumia.]

Sa tuuaia e le Taitai a le Itu Agai i totonu o le Maota Fono, o le Pule Sili a le Matagaluega o Soifua Maloloina, e iai lana pisinisi tumaoti (private clinic) poo se auaunaga tau soifua maloloina, ma o loo faamatuu iai nisi o auaunaga a le Matāgaluega o Soifua Maloloina.

Saunoa Laaulialemalietoa, e matuia nei tuuaiga i luma o le Maota Fono ao faafofoga le atunuu, ona e le o iai ni gaioiga faaalatua o loo faia e le Alii Pule Sili, ae le mafai ona tali mai.

Peitai sa saunoa Tuilaepa: “Ou te lē tau fai atu, o lena tou te silafia.. le telē o le conflict of interest i le Pule o le Falemai.. ma o lea fo’i sa avatu ai le faitioga ma le fautuaga..

“E lelei ona faamatuu i tua o nisi o auaunaga o le falemai i isi falemai, ae o le tele o le faafitauli lea e tupu, a faamakuu e faamakuu i le falema’i a le Alii Pule o le Falemai..”

Ina ua maea le saunoaga a le Taitai o le Itu Agai, tula’i ai loa le Minisita o Faatoaga ma Faigafaiva le afioga ia Laaulialemalietoa mo sona avanoa.

Don’t miss out on Summer Olympic action. Fesootai loa le Digicel ma fesili mo Charlize, e tuuina atu sau Digicel TV e na o le $89 tala i le masina.

“O le mea e fia faasa’o lau Afioga i le Fofoga Fetalai. Sa tuu lava ina ia sāusi le saunoaga a le Itu Agai. Ou te leiloa poo fea le mea lea e sasa solo ai. O le taimi ua sau ua lagolago. O le taimi ua sau ua tetee o le taimi ua sau ua faaoloataua..”

“Lau Afioga i le Fofoga Fetalai, ona o lea ua lalau le Conflict of interest, ae le mafai ona tali mai le faauluuluga o le Matagaluega..

“O fea o le a pulapula iai fofoga o lenei tanalii o le atunuu, ae fai pea le lē mafaufau lenei.. o le lalau o le conflict of interest lenei..

“Ae o le a faafefea le mea na fai? Faafefea na ave lona atalii e pule i tupe ae palemia ia? O lea le uiga o le mea lena?..

“That is a pure conflict of interest!”

Sa fesiligia e Laaulialemalietoa pe aisea ua sa’i mai ai le Taitai o le itu Agai, ae lei faia i lona taimi.

“O lea e le’i talitonu lava, ua fai le finagalo o Samoa, e matou e omai e tauave le atunuu.”

 

O le popolega sa faaleo e Laaulialemalietoa, ona e lē o mafai ona tali mai Aiono Dr Alex Ekeroma i nei tuuaiga matuia, ae o ia o se tasi fo’i ua loa lona tautua i le atunuu. Sa ia taitaia le Iunivesite Aoao o Samoa (Vice Chancellor) ao lea ua tula’i mai e na te taitaia le Matagaluega o Soifua Maloloina (Director General of Health) .

“O le ā lau mea na fai Tuilaepa? Pule lou atalii i tupe ae Palemia oe, ia, o se mea a le tou aiga?”

Sa faatoatoa le Fofoga Fetalai, ina ua tulai ane le Taitai o le Itu Agai ma tauvalaau mai i le Maota Fono, ma faapea mai o Laaulialemalietoa e pepelo ma gaoi.

“O le a ou faaopoopo atu, o oe e leai ma se isi faipule e sili lona pepelo. Gaoi. E te manao ou te tau atua?”

Delicious Cakes is now on the Maua App!

Sa tau faatu se lafo a Laaulialemalietoa e aumai faamaumauga o tuuaiga, ae peitai, sa tuualalao le Fofoga Fetalai faapea le Sui o Sagaga 2 ia Maulolo Tavita Amosa na tula’i e fesoasoani i le faatoatoaina o le mataupu.

“Laaulialemalietoa o lou faalupega ua silafia e Samoa, o Alo o Malietoa. Amuia lē e pulea lona loto nai lo lē e a’ea le olo.”

Sa toe faamalulu ma faalalolao Tuilaepa i le Maota Fono, faapea fo’i Laaulialemalietoa.

“Tui. O le ta va, o loo silasila Le Atua. Ua uma upu leaga o le lalolagi lenei ua e lafo ia te au, ae ou te inu pea.. ua ou faamagalo ia te oe.”

O le auaunaga soifua maloloina o le Alec’s Clinic o loo galulue ai nisi o fomai tumaoti lauiloa ma iloga i totonu o Samoa ma e tele auaunaga faa soifua maloloina e mafai ona faatino ai. Sa faatuina lea auaunaga e Aiono Dr Alex Ekeroma, ae le’i tofiaina o ia e galue o se Pule Sili i le Iunivesete Aoao o Samoa.

O le po o le Aso Tofi 27 Iuni 2024 sa pasia ai le Tala o le Tupe a le Malo mo le tausaga faaletupe mai le Aso 01 Iulai 2024 – 30 Iuni 2025.

Faasalalauga Taua