Ua toe faafoi pepa malaga a se tagatanuu Samoa e nofo mau i Utah Amerika, lea sa molia ma taofia i Samoa nei ina ua tuuaia sa ia faia ni lafoga e faaleagaina ai se tamaliiaga o se tagata (defamation) i upu lafo agai i le Taitai o le Atunuu ma nisi o Minisita o le Kapeneta ma le faigamalo a le FAST.
O Aukuso 2022 sa asiasi mai ai Tuifaasisina Pekina poo Perkins Feagia’i Tauvao Headle i Samoa nei. Peitai sa molia ai loa iā Setema 2022 ina ua faaulu atu i leoleo se tagi a le failatusi a le Faatuatua i Le Atua Samoa ua Tasi (FAST) le afioga ia Va’aaoao Alofipo.
Na faaulu e le failautusi a le FAST se tagi e faasaga ia Tuifaasisina, e tuuaia ai lona faaaogaina mai o se isi itulau ua faaigoaina ia Salote Tauvao e faatino ai ni ata poo video e ta’uleagaina ai le faigamalo ma lafo ai ni upu faifai.
E 25 moliaga sa amata ai lenei mataupu i luma o le Faamasinoga Faaitumalo peitai na tele ina faaleaogaina e le Faamasinoga ona o le lē lava o molimau a le Itu a le Ofisa Sili (Prosecution).
E tasi lava le moliaga sa faamaoniaina e le Faamasinoga lea sa tuu mai ai loa le faasalaga a le tamaitai faamasino ia Alalatoa Rosella Viane-Papalii e totogi ai le sala tupe e $200 tala ma le tolu masina e nofo vaavaaia ai (probation).
Ua faatonuina e le Faamasinoga Tuifaasisina ina ia aua nei toe faia ni faasalalauga e pei ona molia ai.
“Afai e te toe solia le poloaiga a le faamasinoga o le a tuuina atu loa se faasalaga faafalepuipui.”
I taualumaga a le faamasinoga na talosaga ai le alii loia sa tula’i mo Tuifaasisina, le afioga ia Faimalotumua Matthew Lemisio, ina ia faapafala se faasalaga e aunoa ma le faamaonia se moliaga (discharge without conviction).
Ae sa finau foi le itu a leoleo e tauala atu i le Ofisa o le Loia Sili, mo se faasalaga faafalepuipui.
Na fa’aaogaina e le itu a le Loia Sili le mataupu ia Malele Paulo ma ana faasalalauga sa faia i luga o le faacebook, lea sa tuuina mai ai e le Faamasinoga Faaitumalobse faasalaga falepuipui mo le fitu vaiaso.
Saunoa le Faamasino ia Alalatoa, e ese faasalalauga taufaaleaga e pei ona molia ai Malele Paulo, ese le faia o upu faalumaluma, e pei ona iai le mataupu a Tuifaasisina.
“O le mataupu lenei, e na o le tasi le moliaga ua faamaonia e faasaga ia Pekina poo Perkins, o le faia lea o upu faalumaluma.”
Sa faaleaogaina muamua moliaga e 17, o le faia o ata poo video faasoesa, ona o le lē lava o molimau.
Na afea foi e le saunoaga a le afioga ia Alalatoa, le faasalaga e $10k afe tala sa faasalaina ai Tuifaasisina e le afioaga o Fa’ala, ona o lona tuumaualaloina o le afioaga i lenei mataupu.
Ua toe mafai nei loa ona toe taliu atu Tuifaasisina Perkins poo Pekina Tauvao i Utah ma toe faatasi atu i lona aiga ina ua maea lenei mataupu ua silia ma le tausaga sa saisaitia ai.
O se lesona tāua mo e o loo faia lenei gaioiga ma amioga o le lafo o upu faalumaluma ma upu lē migao i luga o le Facebook.
Ae maitauina pea le tele o upu mātuia e lafoina e le toatele o tagatanuu Samoa i luga o le Api o Foliga poo le Facebook, ua lē tusa ai ma tu ma aga a Samoa faapea le mau, e faavae i Le Atua Samoa.
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
