Faa-Samoa

Faasolo le Mataupu a se Tamaitai o loo Tuuaia i ni Lafoga Taufaaleaga agai le Palemia ma Isi

March 24, 2023

107

E 25 moliaga o loo tuuaia ai se tamaitai e nofo mau i Utah Amerika, i lona faia o ni lafoga e faaleagaina ai se tamaliiaga o se tagata (defamation) agai i le tamaitai Palemia ma nisi o Minisita o le Kapeneta.

O Aukuso 2022 sa asiasi mai ai lea tamaitai i Samoa nei ma molia ai loa ia Setema 2022 ina ua faaulu atu i leoleo se tagi a le failatusi a le Faatuatua i Le Atua Samoa ua Tasi (FAST) le afioga ia Va’aaoao Alofipo.

O lenei tamaitai e tele ona suafa – o Perkins Feagia’i Headle Tauvao, poo Salote Syrah Tautai sa faailoa i luma o le Faamasinoga.

Vaaaoao Alofipo, Failautusi a le Vaega Faaupufai, Faatuatua le Atua Samoa ua Tasi.

I le faasologa o le suesueina o lenei mataupu i le Aso Tofi i luma o le tamaitai Faamasino ia Alalatoa Rosela Papalii i le Faamasinoga Faaitumalo, sa tuuina mai ai e le itu a leoleo, e ono ni a latou molimau.

O fā molimau sa tula’i i le aso muamua, e aofia ai Laulu Pelepesite, o se matai o Fa’ala Palauli, o Tapuala Levasa Oloapu, o se alii faasalalau a le EFKS TV, o Va’aaoao Alofipo, le failautusi a le Faatuatua i Le Atua Samoa ua Tasi (FAST), faapea Vui Masinamua Sione, o le faatonu o le Foafoa Radio i Ausetalia.

I le molimau a Tapuala Levasa na ia tā’ua ai, o ia ma le taitaifono a le FAST le afioga ia Laaulialemalietoa Leauatea Fosi Schmidt, na auai atu i se valaaulia mo le faamanatuina o le 60 tausaga o le tutoatasi a Samoa i Carson, Califonia.

I le mae’a ai o lea faamoemoe na toe taliu mai ai le faigamalaga ma malolo i Fiti, ae faateia o ia ina ua faafeiloai atu le tamaitai o loo molia nei.

Sa ia faailoa atu lona suafa ma faapea atu – o ia lea e pito sili ona faifai mai i le polokalame o le Soalepule.

Sa ia sailiili i luga o upega tafailagi le suafa o lea tamaitai, ma faamaonia ai ni lafoga mātuiā o loo ia lalafo agai le tamaitai palemia faapea nisi o minisita o le kapeneta.

Sa faafofoga uma le potu faamasino ao faitau nisi o lafoga sa lolomi mai i luga o upega tafailagi poo le Facebook. E aofia ai ma lafoga i le Palemia o Samoa, Hon Fiamē Naomi Mata’afa faapea le taitaifono o le FAST, Hon Laaulialemalietoa Leuatea Polataivao Fosi Schmidt.

Ina ua molimau Vui Masinamua Sione, sa fai mai i luga o le zoom ona o loo i Niu Sila o ia.

Sa tā’ua i luma o le Faamasinoga, o Vui sa galue o se Faatonu a le Lefoafoa Radio i Ausetalia. Sa ia molimau, o Perkins poo Pekina, e la te aiga i Vaitoomuli Palauli. E valaau foi ia e lē ua molia, o lona uncle.

O Perkins, e na te umia le suafa matai – Tuifasisina ma o se tasi o loo faailoa ona taofi ma finagalo i luga o le Lefoafoa Samoa Radio.

Peitai na ia talanoa iai ua le tatau ona toe tuuina atu se avanoa mo ia ona o ana upu ma faatamalaga faifai ma upu lalafo i le faigamalo.

Ae tali mai Pekina, “E le o se faigamalo na filifilia e le atunuu. O tagata le alolofa ma sue’mea lea ua taitaia le atunuu. Talofa ia Samoa o le a pologa.”

Sa tā’ua e Vui se taimi na pue mai ai se ata o Pekina mai totonu o le US Embassy i Apia ma faapea mai, e le mafai ona aafia o ia ona e sitiseni Amerika.

“Sa ou fai iai e te aafia i le tulafono ona o au faamatalaga lalafo, ae tali Pekina e le mafai ona tupu se mea faapena ona o a’u o le tagata sitiseni Amerika.”

Fesootai mai le Ofisa o le UTOS mo nisi faamatalaga.

Sa molimau Vui, na tali atu loa iai, “Afai o lou manatu lena, e lelei la lou nofo ai pea i totonu o Amerika, aua o le taimi lava e te alu ese ai mai Amerika ae e tuvae i totonu o Samoa, e aafia loa i le tulafono.”

“Na iai foi le taimi na fesootai mai ai Pekina ia te au ma valaau mai uncle ae ou fai iai e aua nei toe valaau mai, o a’u lea o le a molimau i ana upu ma faamatalaga lalafo.”

Sa molimau foi Vui, o le tamaitai o loo molia e tele pages o loo ia faaaogaina i luga o le Facebook.

O Tuifaasisina Perkin Tauvao, o Perkins Feagiai Headly, o Salota Syrah Tautai ma Pekiga Tauvao.

Ina ua molimau le failautusi a le FAST ia Va’aaoao Alofipo, na fesiligia ai e le loia a Pekina pe iai sona tomai faapitoa na te faauigaina ai upu ma faamatalaga na tuuina mai e Pekina e faapea o ni lafoga e faaleagaina ai se tamaliiaga o se tagata. Sa umi ona tālia e le Faamasinoga se tali ma iu ai ina valaau mai e le tamaitai Faamasino se malologa.

Ina ua toe taliu mai toe amatalia taualumaga o le Faamasinoga sa toe tuu atu foi e le alii loia ia Faimalomatumua Mathew Lemisio le fesili ia Va’aaoao. Na tali le failautusi, e leai sona tomai faapitoa, ae peitai, o lana ia lava vaai i upu ma faamatalaga lalafo, e taufaaleaga ma afaina ai tele le tamaliiaga o isi.

O lē ua molia o loo tulai ai le alii loia ia Faimalomatumua Mathew Lemisio, ae o le tamaitai loia ia Leinafo Taimalelagi o se loia tumaoti o loo ia tauaveina le itu a leoleo (private prosecutor).

E toe faaauauina lenei mataupu i le asō, Aso Faraile, i ni molimau se toalua a le itu a leoleo o loo totoe, ae lei tuuina atu molimau a le itu a lē ua molia.

Public Notice