E 17 moliaga ua faaleaogaina e le Faamasinoga Faaitumalo, i tuuaiga o loo faasaga i se tagatanuu Samoa e nofo mau i Utah Amerika, i lona faia o ni lafoga e faaleagaina ai se tamaliiaga o se tagata (defamation) poo le lafo o upu faifai agai i nisi o Minisita o le Kapeneta ma le faigamalo a le FAST.
Sa amata mai lenei mataupu e 25 moliaga e faasaga ia Tuifaasisina Pekina poo Perkins Feagia’i Tauvao Headle.
Sa suesueina e le Faamasinoga Faaitumalo i luma o lana Afioga i le Faamasino ia Alalatoa Rosela Papalii lenei mataupu ia Mati 2023, lea sa fofogaina ai molimau a itu e lua.
Peitai i le toe valaauina o lenei mataupu na fofogaina mai ai le faaiuga a le Faamasinoga, e faaleaogaina moliaga e 17 ona o le lē lava o molimau.
O Aukuso 2022 sa asiasi mai ai Tuifaasisina i Samoa nei. Peitai sa molia ai loa iā Setema 2022 ina ua faaulu atu i leoleo se tagi a le failatusi a le Faatuatua i Le Atua Samoa ua Tasi (FAST) le afioga ia Va’aaoao Alofipo.
Na faaulu e le failautusi a le FAST se tagi e faasaga ia Tuifaasisina, e tuuaia ai lona faaaogaina mai o se isi itulau ua faaigoaina ia Salote Tauvao e faatino ai ni ata poo video e ta’uleagaina ai le faigamalo ma lafo ai ni upu faifai.
Sa fofogaina i luma o le Faamasinoga le tele o upu ma faamatalaga matuia sa lafo e le page Salote Tauvao.
Peitai ina ua suesue lenei mataupu sa finau Tuifaasisina e tauala mai lana loia le afioga ia Faimalotumua Matthew Lemisio, e teena ai lea tuuaiga, ma finau e lē o Tuifaasisina e ona lea itulau ua faaigoaina o Salote Tauvao.
I le iloiloina o lenei mataupu na sa’i ai le Afioga i le faamasino i se tasi o molimau autu a le itu tagi, le afioga ia Vui Masina Mua.
I le taimi sa faatino mai ai le molimau a Vui Masina Mua mai atunuu mamao i luga o upega tafa’ilagi, na faafuasei ona motusia mai ina ua tulai ese o ia, ao suesueina le mataupu ma tuuina atu fesili a Faimalotumua.
Sa saunoa ai lava le Faamasino i lena aso e faaali lona le fiafia ma fofogaina ai ua le taliaina lea molimau, faapea foi ma lana molimau tusitusia.this this
Ua faatulaga e le Faamasinoga le Aso 15 o le masina nei e tuuina atu ai folasaga mulimuli (final submissions) a loia a itu e lua, e fua iai se faaiuga a le Faamasinoga.
- O le afioga ia Taimalelagi Leinafo Strickland o loo tulai mo le itu a leoleo.
