Ua Lē Faamaonia Moliaga e Faasaga i le Sui Komesina o Sulufaiga

0
133

O le taeao o le Aso Faraile na tuuina mai ai le faaiuga a le Faamasinoga Faaitumalo i le mataupu e pei ona tuua’ia ai le afioga ia Maualaivao Pepe Seiuli.

Ua faaleaogaina (dismiss) e le Faamasinoga moliaga uma e tolu sa tuua’ia ai Pepe, e aofia ai moliaga o le lafo o upu faalumaluma, ma le moliaga o le faia o ni upu tau faamata’u agai i se tamalii fai pisinisi sa avea foi ma faipule ma Minisita Lagolago; o Maualaivao Patelesio Ah Him.

Ua faaleaogaina uma nei e le Faamsinoga ia moliaga uma.

I le tolaulauina o le mataupu e le Alii Faamasino, le tofā ia Masinalupe Tusipa Masinalupe, na ia tā’ua ai, na fua le faaiuga a le faamasinoga i le tulaga ua lē ausia e le Itu Tagi poo le itu a leoleo manaomiaga taitasi o le soligatulafono, ae maise o le maualuga e aunoa ma se masalosaloga tatau (beyond reasonable doubt).

O lenei mataupu e faapea o le aso 14 Iuni 2021 na lafo ai e le Sui Komesina o Sulufaiga, Maualaivao Pepe, ni lafoga i totonu o le fono a le nuu, e faasaga i le saofaiga tala luma e faapea; “e leai se isi o outou e iloa fai le nuu, e leai foi se isi o outou e malamalama i le faavae o le nuu, leaga tou te laiti, e sili ai pe’a tou o i tua ae omai le pito i tua o le fale o Malietoa e fai le nuu”.

I le aso lava lea na faapea atu ai Maualaivao Pepe i le saofaiga i talaluma, pe aisea ua le faatea ese ai Maualaivao Pat Ah Him. “E ta’u mai ai tou te valea, fai se tou faaiuga..”

Sa tuuaia e Maualaivao Pepe, o le tala lea o loo nofo ai Maualaivao Pat, o le tala a Maualaivao Pepe, e le nofo ai Maualaivao PatbAh Him, “ae fai se tou faaiuga, e le mafai ona tou tālia se vevesi pe a tupu mai”.

O ia lafoga a le Sui Komesina o Sulufaiga, na mafua ai ona faaulu le tagi a Maualaivao Pat Ah Him i leoleo, ona o upu lafo ma upu faamatau.

E toaiva molimau a le itu a leoleo na tulai i luma o le Faamasinoga e molimau i lenei mataupu.

O nei molimau o ni matai lava o le afioaga sa auai i le taimi o le fonotaga.

E lei mafai ona tuuina atu ni molimau le itu tetee, ae i le iloiloga a le Faamasinoga, o loo tā’ua ai, o Maualaivao Ah Him, e lei auai i le fonotaga a le nuu i le Aso 14 Iuni 2021.

Ae sa ioeina foi e Maualaivao Pat Ah Him le mau, o le tulaga lava lea o fonotaga faalenuu, e siisii ai lafoga, ae o aga faafono lava.

Sa ioeina foi e latou na molimau, e na o lafoga sa fai, ae leai se vevesi poo ni fusuaga.

Sa tā’ua foi e le Faamasino, o le tagataga’i a le Faamasinoga, e lei faauluina se tagi a le saofaiga matai faiupu o le afioaga, lea sa agai iai lafoga, ma o lea ua mafua ai ona solofua e le Faamasinoga moliaga e faasaga ia Maualaivao Pepe Seiuli.

O le Alii loia ia Alex Sua na tulai mo Maualaivao Pepe Seiuli. Sa ia faailoa mai, o lea ua ma’ea nei lea mataupu ae o loo iai foi se isi mataupu o le a sueaueina i le Aso 6 Oketopa o le tausaga nei. O lena mataupu o loo tuua’ia ai foi Maualaivao Pepe Seiuli i lona taumafai lea e sui le faavae a le afioaga o Malie.