Tolopo le Mataupu a Sam se’i Tālia sana Faata Faapitoa – CT Scan

Ona e taua tele [le CT scan] e lagolago ai le talosaga mo se avanoa e tatala ai Samuelu I tua."

0
1107

O loo finau le loia o loo tulai mo Samuelu Su’a mo se avanoa e faatino ai se fa’ata faapitoa (CT scan) e lagolago ai se talosaga e tatala ai o ia i tua ao tālia taualumaga o le faamasinoga i moliaga o le taufaaleaga (defamation).

O loo tteena malosi e le loia a le itu a leoleo, Taimalelagi Leinafo Strickland le talosaga a Sam e tatala ai o ia i tua.

Peitai o loo finau malosi foi le alii loia ia Fetu Lagaaia o loo tulai mo Sam, e tāua tele le CT scan mo le talosaga tatala i tua (bail application) a le o loo molia.

Sa faailoa e Taimalelagi Leinafo i luma o le faamasinoga, “sa agai ane leoleo e momoli ifo Samuelu mo le faia o lea lona fa’ata peitai, e lei iai se avanoa o le masini ona e lei iai se faatulagaina o se avanoa (appointment).

Ua talia e le tamaitai faamasino ia Talasa Atoa-Sagaga le talosaga a Fetu Lagaaia e tuuina atu se avanoa e tolopo ai lenei mataupu sei faatino le CT scan.

“Ona e taua tele [le CT scan] e lagolago ai le talosaga mo se avanoa e tatala ai Samuelu I tua.”

Ua faatulaga ai e lana afioga ia Talasa Atoa le Aso Tofi nei 15 Fepuari e toe fofogaina ai lenei mataupu sei taulimaina e le faamasinoga le lipoti a le falemai ma tuuina atu ai se faaiuga mo lenei talosaga.

E tolu suafa eseese e iloa ai lenei alii. O Samuelu Piki. O Sam Leau. O Fauega Leau.

O Samuelu ma lona toalua ia Sivai Kepu o loo molia i le moliaga o le taufaaleaga (defamation) ona o ni faasalalauga i luga o upega tafa’ilagi ma le facebook o loo tuuaia ai e Sam le afioga ia Lealailepule Rimoni Aiafi mo le maliu o se talavou i se faalavelave tau taavale ia Aperila 2021.

E tele fo’i ma nisi faaupuga ma faamatalaga e tuuaia ai ma faaleaga ai le Matagaluega o Leoleo, le Komesina o Leoleo ma nisi o le mamalu o le atunuu.