Molia lē sa avea ma Minisita Lagolago o Leoleo

0
9829

Ua molia e leoleo se tasi o faipule o le Maota ae o ia foi sa avea ma Minisita Lagolago o le Matagaluega o Leoleo ae lei faamaloloina o ia e le Palemia.

O le afioga iā Fepuleai Faasavalu Faimata Su’a, sa faatonuina ai e le taitai o le Malo le afioga i le Sa’o Faapito ia Fiame Naomi Mata’afa le Sui Faipule o Salega Numera 1, ina ia faamavae mai lona tofiga o le Minisita Lagolago ia Novema 2023.

Sa tumau pea o ia o le Sui Faipule o le Itumalo.

Ina ua fesootai atu le afioga i le Komesina o Leoleo Auapaau Logoitino Filipo, sa ia faamaoniaina ua molia le Sui Faipule, peitai, sa ia saunoa o le asō o le a valaau mai ai se faatalanoaga ma le vasega o Tusitala, e tuuina mai ai nisi faamatalaga.

Ae o se fesootaiga ma le mataupu o loo suesueina nei i luma o le faamasinoga, lea e pei ona taofia ai Samuelu Piki poo Sam Leau poo Fauega Leau.

O loo taofia ma suesueina Samuelu ma lona toalua i le faia o faamatalaga taufaaleaga e aafia ai nisi o Sui Faipule faapea leoleo faapea ma nisi o le mamalu o le atunuu.

Saunoa Auapaau, e le mafai ona tuuina mai nisi faamatalaga, sei tuuina mai i se feiloaiga ma le vasega o tusitala, o le a faamalamalamaina ma faalauitele mai e le Komesina moliaga ma le atoaga o suesuega a leoleo lea ua taunuu ai le faia o moliaga e faasaga i le Sui Faipule o Salega 1.

O Fepuleai sa faasala tupe i le $100 e mafua mai i le lavea ai o le taavale a le Matagaluega sa ia faafoeina i luga o le auala laupapa lea ei luma o le faleaoga o Manumalo.

Mulimuli ane sa faasala ai foi le Samoa Airways ina ua taumafai o ia e ulufale atu i Amerika Samoa e aunoa ma se pemita.