35 Tausaga o se Taulealea o loo Masalomia sa Malemo mai Samata Tai

"O loo fesuisuia'i mai tulaga o le tau, louloua ma timuga mamafa.. O loo maitauina foi le malolosi o galu, ma e tāua tele le ave o le faamuamua i le saogalemu."

0
476

E 35 tausaga o se alii sa maliu i le faaiuga o le vaiaso na tea nei mai le afioaga o Samata-i-Tai, Satupaitea, ma o loo masalomia sa malemo o ia.

I se faamatalaga mai le Komesina o Leoleo le Afioga iā Auapaau Logoitino Filipo, o se taulealea na agai ma lona uso laititi e fagogota i le po o le Aso Toanai.

Peitai na tulai mai ai se faalavelave, ma logoina atu ai loa le Matagaluega o Leoleo.

Sa tali atu le vaega o le gataifale ma faatino loa le sailiga, faatasi ma nisi o matai ma taulelea o le afioaga.

Saunoa le Komesina sa manuia sailiga ina ua toe maua mai le tino o le taulealea, ae ua maliu o ia.

O le tulai mai o lea faalavelave, ua toe momoli mai ai se fautuaga mai le Matagaluega e ala mai le Komesina, ina ia tautuana le saogalemu.

“O loo fesuisuia’i mai tulaga o le tau, louloua ma timuga mamafa..

“O loo maitauina foi le malolosi o galu, ma e tāua tele le ave o le faamuamua i le saogalemu.”

Hotel Elisa. Call +685.21116 or Visit www.hotelelisa.ws or Email: hotelelisa@samoa.ws