Apia Samoa 15 Novema 2022. O se faanoanoaga tele i se tasi o aiga i Tufulele ina ua maliliu ni tamā se toalua i le taeao o le Aso Sa ua mavae atu nei.
O se tamā e 52 tausaga sa oso lona ma’i i le fale. Ae o le faanatinati atu o le tuagane laititi o lona toalua (brother in law) e avatu lenei tama i le falemai, sa lavea ai le taavale ma maliu ai foi ma ia.
O lenei faalavelave na faamaonia mai e le Sui Komesina o Leoleo, Papalii Monalisa Tiai-Keti.
Ina ua fesiligia e le Samoa Global le Sui Komesina e tusa ai ma suesuega a le Matagaluega i lea faalavelave, na saunoa Papalii, “O le taeao o le Aso Sa, i le tea o le itula e ono sa logoina mai ai le matagaluega i lea faalavelave.”
O le tamā sa oso lona ma’i i le latou fale, i se faamatalaga a sē tasi o alo e faasino i lenei tamā, sa latou iloa lava ua uma le ola o si o latou tamā, ae sa faanatinati atu lava si o latou uncle e ave lo latou tamā i le falema’i.
Peitai, sa lavea le taavale ao ui mai i auala fou o le afioaga o Tufulele-Uta.
Tā’ua e Papalii e toalima i latou o le aiga na malaga i le taavale i lea taeao, e tulituli atu le falema’i.
Na tā’ua e le Sui Komesina, o loo masalomia le saoasaoa tele o le taavale i le naunau e oo atu i le falema’i, ua mafua ai lenei faalavelave.
O loo faasolo pea suesuega a leoleo i le mafuaaga o le faalavelave, ae o le taimi nei e le’i iai se isi ua moliaina e leoleo.
E momoli atu faamaisega a le Global News i le aiga faanoanoa, ua aafia i lenei faalavelave.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
