550 Avanoa Faaopoopo mo le Se’i o le Quota mo Niu Sila

0
1500

O le tausaga lona lua lenei o le a si’itia ai avanoa mo talosaga i sitiseni nofomau i Niu Sila e pei ona iai le se’i o le Quota mo Samoa i tausaga ta’itasi, lea e masani ona 1,100 avanoa, ae o lea ua siitia i le 1,650.

O le si’itia o avanoa talosaga mo sitiseni Niu Sila e tusa o fa’amaumauga a le Ofisa o Femalagā’iga a Niu Sila, e afua mai i avanoa sa le’i mafai ona fa’aāogaina i le Se’i o le Quota i le 2020 ma le 2021 ona o le Koviti – 19.

O lona uiga, o ia avanoa sa le’i mafai ona fa’aāogaina, o le a fa’asoasoa i totonu o tausaga e lima, e amata atu i le tausaga e 2022 se’ia o’o atu i le 2026, ma ua ta’oto ai le fa’aopoopoga e 550 si’itia ai le aofa’iga atoa o avanoa o talosaga mo sitiseni i Niu Sila i le 1,650 i le tasi tausaga.

O lenei faaopoopo e tusa ai ma le faamalamalamaga a Niu Sila – e faamanuia ai tausaga e lima – 2022, 2023, 2024, 2025 ma le 2026, ona sa taofia, ma le mafai ona faatino lenei faamoemoe mo le lua tausaga o le koviti. O le tausaga 2021 ma le 2022, sa leai nisi na malaga atu mo le Quota nofomau, lea la e faaopoopo ai tausaga ia mai le 2022 – 2026.

Mo le mamalu lautele o Samoa o lo’o fia talosaga mo ia avanoa, ua fa’amalosia ai le tu’uina atu o so’o se talosaga e fa’aāogaina ai ‘upega tafa’ilagi a le Ofisa o Femalagā’iga a Niu Sila.

O lea faiga fa’avae sa amata mai le tausga ua mavae ia Oketopa 2022. O le a fa’amamaluina foi mo le se’i o le Quota 2023.

O loo ua tatalaina nei le resitaraina o suafa, se’ia tapunia i le Aso 31 o Aokuso 2023.

TALOSAGA E FA’AĀOGA AI ‘UPEGA TAFA’ILAGI

O le Ta’iala i le resitalaina o talosaga mo le Se’i o le Quota i luga o ‘upega tafa’ilagi, sa amata fa’atino mai le masina o Oketopa 2022, ina ua fa’atoā toe tatala o tatou tuāoi fa’avāomālō ona o le Koviti – 19. O so’o se tasi e talosaga mo ia avanoa, e matuā fa’amalosia lava le fa’aāogaina o ‘upega tafa’ilagi e tu’uina atu ai lau talosaga.

O lea faiga, sa matuā sa’ausi lelei ai le soālaupulega ma le fa’atalanoaga i le va o le Ofisa o Femalagā’iga a Niu Sila ma atunu’u o le Pasefika tauala atu i le Matāgaluega o le Va i Fafo (M.F.A.T.).

O lea faiga, na fa’ailoa e le Ofisa o Femalagā’iga a Niu Sila, ina ia faigofie, vave ma mautū lelei ona tapena vaega uma e mana’omia mo e o le a talosaga.

TAIMI FA’ATULAGAINA:

Mo le se’iina o le Quota o lenei tausaga, o lo’o i ai le fuafuaga ae le’i fa’amautūina, o le Aso 06 Oketopa 2023 e se’i ai numera ua manumālō a’o le Aso 16 Oketopa i le Aso 20 Oketopa 2023, e tu’uina atu ai le Tusi e fa’ailoa ai ua taliaina lau talosaga.

O i latou ua fa’amanuiaina, e tatau ona talosaga mo le nofomau i Niu Sila i totonu o le 8 masina talu ona tu’uina atu le Tusi e fa’ailoa ai ua fa’amanuiaina oe (Invitation to Apply).

Mo nisi fa’amatalaga atili e tusa o lenei fa’amoemoe, fa’amolemole asiasi i le ‘upega tafa’ilagi a le Ofisa o Femalagā’iga a Niu Sila, o lo’o i ai le kopi i le Gagana Samoa ma le Fa’aperetania mo lo outou silafia:

• Taiala mo lesitala i luga o le initaneti mo le se‘i o le Samoan Quota Resident Visa immigration.govt.nz