Faa-Samoa

Talosiaina e le Palemene le Gasegase o le Afioga i le Taitai a le Itu Agai

January 19, 2022

267

Aso Lulu 19 Ianuari 2022, Apia Samoa. I le tauaofia ai o le fonotaga a le Palemene mo le tausaga 2022, na maitauina ai mo le uluai taimi le lē nofoia o le nofoa a le afioga i le taitai a le Itu Agai, le afioga ia Tuilaepa Dr. Sailele Malielegaoi, ona o ni gasegase o le tino. Sa talosia ai e le mamalu o le Palemene i le talosaga a le afioga i le Fofoga Fetalai Papalii Lio Taeau Masepau le gasegase a le afioga a le taitai o le vaega faaupufai e Puipuia Aia Tatau a Tagata (HRPP).

O le vaiaso na tea atu nei i le po o le Aso Tofi 13 Ianuari 2022, sa taofia ai le afioga ia Tuilaepa i le falemai i Motootua. Sa vave ona faasolosolo ina manuia togafitiga, ma toe tea mai ai i tua i le Aso Gafua 17 Ianuari 2022.

Sa faaalia ni finagalo faanoanoa i nisi o sui mamalu o le Palemene ina ua le auai Tuilaepa i le uluai fono o lenei tausaga. O le toatele sa faapea mai, e letou te le manatuaina se taimi sa le auai ai le sa fai ma Palemia o Samoa i se usugafono a le Palemene.

Sa saunoa le afioga ia Peseta Vaifou Tevaga, e ia sa fai ma Minisita Lagolago o Galuega e faaalia se lagona faanoanoa ina ua le nofoia le nofoa a le latou taitai.

“O ia o se toe Iutaia o le Maota o le Palemene, o le matou taitai matou te faaaloalo iai, matou te faatilotilo laumea uma iai. O le taitai na ia sailia le manuia mo le atunuu. E pei o le faanoanoaga lena, ua le auai mai i le fonotaga a le Palemene o gasegase o le tino, ae talosia e maua lona malosi e afio mai ai i le fonotaga taeao”.

Sa toe maitauina foi le le auai atu o le afioga i le taitai a le HRPP i le aso lona lua o le fonotaga a le Palemene.

O le afioga ia Tuilaepa sa avea o ia ma Palemia o le Malo Tutoatasi o Samoa mo le lata i le 23 tausaga, mai lava ia Novema 1998 i oo mai ia Iulai o le 2021.

Tatalo

“Matou tatalo Le Alii e, e matou te manatua foi se tasi o tama o sui usufono o le Palemene le susuga ia Tuilaepa o loo fataotolia o ia i gasegase o le tino, ua matou maua ua faasolosolo manuia o ia ae o le matou tatalo lo matou Tama e, o a lava toega i togafitiga le Alii e, o le matou tatalo le Alii e ia avea ia galuega lavea’i a alii ma tamaita’i fomai ma taulasea ia ma faamamana ai lou mana e laveai mo ia ma lou mana faamalolo mo ia ina ia faapena ona toe faafo’isia lona malosi, ma ia toe faafoi mai foi ia matou galulue i matou galuega masani le Alii e.