Ua tasi le tofa ma le faautaga a Alii ma Faipule a le afioaga o Toamua, e tafi ese le aiga na autū iai le osofaiga a leoleo ma maua ai fualaau faasaina.
I se faatalanoaga ma le afioga ia Ale Vena Ale sa ia tā’ua ai, e le o se faatoa tupu lea.
“E fai inuga pia ma faapāpā fana ma pisapisaō, ae na lapata’i muamua foi e le nuu ae lē o usitaia.”
Saunoa le Sui Faipule o le itumalo, e lē o ni aiga Toamua, ae o aiga na omai faatau latou fanua.
“Ae le faapea lā e ūumia saoloto ona tafili saunoa ai lea, leai, e i lalo o le faamalumaluga a le nuu lenei Toamua, ae o lea ua ta’uvalea ai le nuu..”
Saunoa foi Ale, o le tele o aiga e agai mai ma nonofo i latou fanua faatau i Toamua, ua gagau apolapola, ma fainuu i Toamua.
“O le auga lena ma ala na mea, o le feosiosia’i, ae o le aiga lea e pei e foliga e tetee mai i le nuu..
“O le popolega ia i matou nei, o le aafia ai o tupulaga ma fanau o le nuu i uiga faasolitulafono.”
O le aso ananafi, le amataga o lenei vaiaso na tasi ai le tofa ma le faautaAlea Ale ma Ulu ma le aiga ma le tulua Satunumafono, e faate’a ma tafi ese le aiga na osofai e leoleo ma maua ai fualaau faasaina.

O le totoo na saunoa ai le tofi faipule, “Ia ta ifo le 4 i le afiafi o le Aso Lua, ua o ese ma le nuu..”
“E toe asi mai e le nuu poo usitaia le tofa a le nuu, a leai o le a oo loa se isi tulaga, poo le toso o le pa ae leo taulelea.”
O loo nofo taofia nei i lalo o le vaavaaiga a leoleo ni alii se toatolu ma ni tamaitai se toalua, e talia ai le Aso 22 o Me e tulai ai i le faamasinoga e tali moliaga o le uumia o fualaau faasaina.
O se osofaiga a leoleo na faia i se aiga i Toamua Uta lea na maua atu ai i le fale sa autu iai le osofaiga ni pauta o le aisa, mariuana, o laau malosi, o paipa e ula ai le aisa, o masini lap tops ma masini pue ata faalele i luga o le ea.

- 177 Moliaga o le Gaoi a o Avea ma Tagata Faigaluega o le National Bank of Samoa - December 4, 2023
- Toe Tolopō i le 2024 le Mataupu a lē sā Gaoi le $1.5 Miliona mai le ANZ Samoa - December 4, 2023
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023