Sa tulai le alii fomai faapitoa o Dr Paul Botterill mai Kuiniselani i Ausetalia, ua silia i le 30 tausaga o avea ma alii fomai o loo ia umiaina le faailoga o le Bachelor of Medicine in Surgery with honors mai le Iunivesite o Sini i Ausetalia 1983, faapea foi ma le fellowship of pathologist Australasia 1994.
O loo galue o ia i Kuiniselani i se nofoaga e igoa o le Health Forensic and Scientific Services i le maota gasegase i Cairns i Kuiniselani Ausetalia lava.
O le alii fomai lea sa ia faatinoina le taotoga e suesueina ai le mafuaaga tonu o le maliu o Sa’u Justina Sa’u, lea sa avea ma ofisa sili o le UTOS.
Na ia faaalia talu mai le silia i le 30 tausaga o avea o ia ma fomai e suesueina tulaga faapea faatoa ia suesueina lea o se maliu o loo masalomia ai le pule i le soifua e ala i le sisiina o le ua (tulou) ua sili atu ma le sefulu ni manuaga i le tino.
O le manuaga muamua e pei ona faailoa e le fomai o laina sesega e lua i le itu taumatau o le ua, e au atu lona umi i lalo ifo o le taliga taumatau, tusa ma le 7-8 senitimita i lalo ifo o le auvae, pe a ma le 2 senitimita i lalo ifo o le taliga taumatau, ma e au atu lava laina ia i le itu taumatau i tuā ua.
O manuaga lona lua e faapena foi laina ia e agai atu i le itu agavale e tutusa lelei lava ma le itu taumatau o le ua. O ia laina e mafai ona mafua mai ona o se isi meafaitino e pei o se maea, e fesoloa’i i le ua, e mafua ai ona iai faailoga ia.
Manua lona tolu e faapei o se atigilima na mafua ai le maosia o se laina i le itu taumatau o le ua. I le iloa ma le manatu o le alii fomai, afai e afaina le tino i le atigiilima e salasala lava ona iai ni faailoga, seivagana ai le pito atigilima maai e mafai la ona maua ai se laina i le loloto lea o loo vaaia i nisi o manua ia. E le o mautinoa lea tulaga peitai, o atigilima o mea ia e ono oo iai ni manuaga tai pei o le manua lea.
E lua senitimita le umi o le manua lona fa, o se tipi i luma o le itu taumatau o le ua. O lea manua e lei oo atu lona loloto i le aano o le tino e mafua ai ona laititi i le vaai. Na faaalia e le alii fomai e mafai foi ona mafua lea manua pe afai sa tipi le maea i se agaese ma lavea ai le ua.
O le lona lima o manua o le unooa i se vaega o le tualima taumatau pe a ma le 7-8 senitimita mai le tulilima, o isi manuaga e au atu i le 8 vaega o loo atagia ai unooa i le lima taumatau.
Na vaaia foi i mea papae o mata ni togitogi lanu mumu o le toto to’a. E tutusa lelei lava ma le vaaiga i foliga ma le ua, o loo iai foi togitogi lanu mumu nei o le toto to’a ma o loo iloa foi lea tulaga i totonu o mata i luga ma lalo o ufimata (eyelids).
Saunoa le alii fomai e mafua lea tulaga pe afai ua iai se mea ua na taofia le fesoloai o le toto mai luga o le ulu e agai atu i le tino atoa. E foliga mai o se malosiaga i le ua na mafua ai ona oso faafuasei le toto i le ulu lea o loo vaaia ai tulaga ia i foliga ma mata. O le upu faaperetania o le “petechiae” e mafua ina ua masae alatoto ninii (caplillaries) ma mafai ai ona sao atu le toto i le tino lea o loo maua ai le toto to’a i foliga. Taua e Botterill i lona talitonuga, o se malosiaga i le ua na taofia le fesoloa’i o le toto lea ua mafua ai vaaiga ia.
O ni tulaga e pei o ni lima e fusi faataamilo ai le ua, ia poo se maea foi, e leai a se eseesega o le tulaga lea ma se tagata foi lea e taofi lana manava, ia poo se fafine foi o faatiga o le a fanau e taofi lana manava, e mafua ai ona oso faafuasei i luga le toto i le ulu. I le suesuega lenei, o se malosiaga na taofia le ua, e mafua ai lea tulaga.
Na faailoa e le alii fomai afai o se tasi ua sisi le ua (tulou) o lona uiga e tumau pea le malosiaga e ala i le maea lea o loo nonoa i le ua, ma e ititi lava le toto to’a ma togitogi e iloa i le tino poo foliga foi.
E ese la lea mai le tagata o loo titina (tulou) o loo tafiti ma fiasaoloto, e mafua ai ona lē tumau le uu ma lē tumau ai le malosiaga o loo faatino i le ua ma o le tulaga tonu la lena e mafai ai ona tele atu ‘petechiae’ poo togitogi lanu mumu pe viole foi o le toto to’a e iloa i foliga, ma isi vaega o le tino.
I le suesuega lea o loo vaai ai le tulaga lea o le tele o petechiae o loo vaaia i totonu o mata, le ua ma foliga. O loo faailoa ai o le malosiaga sa polokaina le ua sa mafai ona titina ma mamulu, titina ma mamulu.
Sei vagana ai lava o se tagata o loo sisi le ua (tulou) ae o loo mafai ona tu i se mea faitino ma taumafai e tu sa’o ai, e ono iai ni Petechiae ae e le masani ma e fou i se tagata e sisi le ua (tulou) ona iai ni petechiae se tele faapea.
O loo faapea mai le alii fomai o le “neck compression” le mafuaaga o manua nei.
E ese mai manuaga ia o loo iloa i luga o le tino e tusa ma le 9 manua i lalo o le pau i totonu o le aano ma ponaivi o loo maua i le suesuega, e aofia ai le unooa i le aano i totonu o le pau i lalo ifo o le auvae (bruising in the tissue underneath the chin).
O totonu o le fofoga i le itu taumatau, o loo iai unooa e lua i totonu o le ua, i le itu taumatau i le maso i le ua. O le unooa lea e loloto tele, ma o le unooa i le itu tauagavale o le ua e taipei foi o le itu taumatau. O le isi manua e i totonu o le ponaivi tu o le ua i le itu agavale ma le taumatau, atoa ai ma le unooa i le maso i lalo ifo o le laulaufaiva.
Faailoa e le alii fomai o le tino lea foi na mafua ai le tele o isi manuaga i lalo i fo ole pau poo totonu o le tino.
O le atoaga o le lipoti otooto a le alii fomai o loo taua ai e talafeagai foi pe afai o iai ni manuaga sa mafai ona mafua ona o le taimi na maua ai, o loo maua foi e mafai ona iai ni manuaga e mafua mai i le sisi o le ua, pe gaui ai foi ponaivi i le vaega tonu o le faai (tulou) lea o loo maua ai le leo. O loo iloa i le suesuega le matua faaleagina (voice box).
Peitai i lona iloa ma le tele o tulaga ua ia suesueina i mataupu tau le pule i le soifua e faaoga ai le sisi o le ua, e le masani lava ona mafua mai i le sisi o le ua (tulou) ni manuaga faapea, aemaise ai o unooa i totonu o le tino o loo maua.
E tusa ma le 4 manua i le ua i luga o le pa’u, 7 manua o le ua i totonu ma le 2 manua i lalo o foliga i totonu.
I le tele o mataupu tau le sisi o le ua, e iloa lava faailoga e pei ona faaalia. Ma e le masani ona faaleagaina ai le vaega o le faai lea e maua ai le leo.
O isi manua o loo i lima ma vae, pe a ma se tasi le aso tuana’i ai na mafua mai ai i se tulaga ua taua faaperetania o le “blood force contact” – o ni unooa mafua mai i le tau atu o le tino i ni mea malo pei o meaafale poo mea faapena.
O le tulaga i le manava ma le tulaga o meaai, vai poo se ava malosi, na faaalia e le fomai faapitoa, e leai se tulaga faapea o maua ai. Na ia faailoa foi o le tele o tagata e faatino le pule i le soifua e muamua agai i isi tulaga e pei o fualaau, a leai loa ona faatoa agai lea i se tulaga e pei o le sisi o le ua, o loo maua foi faailoga o atigilima i le ua, atoa ai ma le malosiaga i le ua ua mafua ai le tele o manuaga i lalo o le pau.
Sa faailoa e Botterill e le mafai ona iai se tulaga faapea ua e tago lava oe titina lou ua (self inflicted). Na ia faailoa e le mafai se tulaga faapena ona mafua ai se maliu o se isi.
Na faaalia e le fomai i lona iloa e ala i suesuega, o le mafuaaga o le maliu, o se malosiaga na oomiina le ua, e pei o le titina, o le faaogaina o tamatamailima, poo se maea fo’i.
(1)
