O Mele Mariana Laban Sila mai Satuimalufilufi, o se tamaitai sa tausi tama ia Sa’u Justina Sa’u ma Kolani Junior Lam, amata mai ia Ianuari o le 2017.
Na ia faailoa i le faamasinoga le tulaga sa iai le aiga, aemaise la latou mafutaga, ao lei nonofo le ua maliu Sa’u Justina Sa’u, ma le o lo’o molia nei i lenei mataupu, Kolani Junior Lam.
Sa fa’ailoa e Mele o se aiga fiafia lo latou aiga ao nonofo ai i Ululoloa, a’o le’i faatasi Justina ma Kolani.
O Ululoloa o se tasi o fanua o loo iai le fale o Justina. Ina ua maliu le toalua muamua o Justina sa amata loa ona ia faigaluega i le vaaiga o le fanau matutua e toalua a Justina, O Faasamoa ma Talei. O lana vaai i lea taimi i lo latou aiga e saoloto le olaga o Justina e fiafia i taimi uma. E masani ona o aai i faleaiga i le po, pe agai foi i le tifaga.
O le mafuaaga na ala ai ona le toe faigaluega i lea taimi ia Justina ao iai pea i Ululoloa, ona sa maitaga. O le taimi la na toe fo’i mai ai e faigaluega ia Justina, sa o’o atu Justina i lona aiga i Apolima lea e nofotane ai lona uso o Annie, i le tuagane o Justina. O se feau na tu’uina i lona uso faatasi ai ma lona pasese ina ia o’o mai ai i le UTOS e vaai lana pepe.
O le molimau a Mele, o le oo mai o ia i Sinamoga sa feiloai ai i le ua molia, ma o le afiafi lava o le aso muamua o Mele i Sinamoga sa ia vaaia ai mea nei.
Na faamavae atu Justina ia i latou ae agai atu i lana fono i lea lava afiafi, o ia ma Julani le pepe a le ua maliu, o Kolani faatasi ai ma tamaiti e aofia ai le fanau matutua a Kolani, sa latou nonofo i le fale.
E le’i umi ona alu ese atu Justina ae ona vaaia loa tama e toatolu o le LTA, o uo ia a Kolani ua agai atu ma fai loa le inuga. Na taunu’u atu Justina poo se taimi o le valu i lea po, ma si’i mai Jurani ma aga’i loa i le potu ma momoe ai, ae o lo’o faia pea le inuga lea i tua o le fale.
Po’o se taimi o le tasi i le vaveao, ao fai lana telefoni sa ia fa’alogoina ai le tagata o leotele ma faapea, “Le mea ga e migoi.”
O ia e fa’ateia ona e leai a nisi o lo latou aiga ae po’o ai lea e pisa. Na fa’ailoa e Mele e falo mai i fafo ma le potu, o Justina o lo’o saofa’i i lalo ma ia taofi le laulau. O le laulau lapotopoto lea e ta’amilomilo ae o loo ‘ai ai le o lo’o molia i luga. A asu le sipuni a le ua molia ua migoi le laulau ona leotele lea o Kolagi, “Keke ou fela o ga e migoi le laulau”.
Molimau Mele o ia e faate’ia tele ona o le ese o le tulaga sa iai le olaga i Ululoloa, ma le tulaga lea ua ia vaaia i lena po.
O le maea ai ona tausami o le ua molia, a’o tau mafaufau lava se gaioiga a Mele e fai se’i oo mai ai i fafo e vaai. Na ia taua sa ia faataga savali mai e alu i le faletaele. Ao le’i o’o i le faletaele, sa ia fa’alogoina le ua molia o fa’apea, “Aumai lo’u solo”.
Molimau Mele sa ia afe loa i le umukuka, ma tutu ai. Na aga’i Justina i le faletaele ma faataele le ua molia. Sa faailoa e Mele na ia vaaia ua agai mai Kolani i fafo ma le solo, ae sau Justina ua susu uma. Pe o se mea o le tasi i le vaveao na vaaia ai lea tulaga, i lona aso muamua i Sinamoga.
“Na matua o’u te’i lava, ona o le taimi a’o i Ululoloa e leai se mea faapea. Ou te le vaai foi e suffer faapea, ae tasi a le aso na ou vaai ai i folaiga o le ua molia, o’u iloa ituaiga tagata e iai”.
Molimau Mele o ia sa agai e weekend i tua, na oo atu loa i Apolima fa’amatala loa i lona uso lea e nonofo ma le tuagane o Justina mea uma sa ia vaaia.
E toe fo’i mai i le Aso Gafua na soso’o ai ae faapea atu Justina ia te ia ina ua manava atu
“A toe tutupu ni mea ii i Sinamoga, aua nei e toe alu e ta’u i tuā.”
O aso uma lava e tele a vevesi laiti e tutupu ai, ona o lana maitau, e o atu a tama o le LTA i aso uma e fai pati. A le amata i le 3 i le afiafi o le 5 i le afiafi seia tau lava i le leva o le po.
Sa ia maitauina lava e iai vevesi e tele ina tutupu, ae sa ia le’i amanaia lava.
E iai le isi vevesi e faalogo atu ua patapatatu mai totonu o le potu, pei ni mea e tauai solo. Sa savali mai i fafo ma lona potu, e fetaui a le o’o mai ae savali mai loa i fafo Justina mai lo la potu, o la e si’i mai Julani, ma lana tala e fa’apea,
“Sa sili ai ga e kago e fasioki a’u”.
Na tau mai lana vaai ia a’u ma faapea mai, e tapena a matou mea matou te o i Ululoloa. Poo ua te’a lea o le 2 i lea vaveao. O lea fo’i taimi o lea e pepe Julani ae ua amata ona toe carry (maitaga) Justina.
“Sa ou fai atu iai e sau i le potu lea matou te momoe ai ma tamaiti, matou te momoe ai seia aulia taeao ona o loa lea i Ululoloa, ma faapena loa ona fai.”
Na malama le aso fou ma na ia vaaia pe o se mea o le 11 i le taeao ae talanoa loa Kolani i le telefoni ia Justina. Taua e Mele, na ia mate ua fa’apele foi e le ua molia Justina ona o lea ua iloa o le a o i Ululoloa. O le afiafi lava lena ina ua manava atu Justina ma le fa’aupuga, “Tatou nonofo ia, ua uma fo’i lo’u ita”.
“O nei vevesi uma e leai se mea e fa’amatala mai e Justina ia te a’u, ae o vevesi uma lava ou te fesili ai lava ia Kolani, po’o le a foi le mea ua tupu?”
“Na ia tali mai i leisi taimi, o lana miti na fai o la e misa lona tinā ma Justina. Te’i ane loa i luga o la e taoto faasaga mai le ua maliu ia te ia, tau ai loa ma le tu’i i le gutu.”
O le maitau a Mele e toeitiiti lava afiafi uma e vevesi ai ona o afiafi uma e fai ai inuga pia. A tupu fo’i vevesi, e tele i le taimi ua momoe ai tamaiti ae na’o ia o loo ala.
“E tolu lava vevesi tetele na tupu o ou iai,”
O le isi vevesi na faamatala e Kolani ia te ia i le taeao e sosoo ai, ina ua fesili iai, ae fai mai:
“Ua ita lava i le faalavelave atu o Justina o la e tau moe, ae fafagu atu e alu e aumai le vaifiva e faainu ai Julani.”
O lea vevesi na tago ai le ua molia ta le ili uila gau. Na ia faapea atu fo’i na ia tago lia’i atu le ili uila, ma na te le mautinoa po’o le patua po’o le manava o Justina na tau ai le ulu o le ili uila lea.
E iai le po na vevesi ai e aafia ai Talei. Sa o Justina ma Kolani e tafafao. Na fo’i atu ma meaai, na aai faatasi ai i luga o le laulau, o le isi itu o Kolani sa nofo ai Talei.
Fai loa le tala a Kolani ia Talei:
“Talei o le a le mea eke le kago ai e valaau a’u ia dad?”.
Ae sa faapea atu Talei, “Ia leaga o lou igoa o Kiuga e kakau a oga valaau oe ia Kiuga.”
O lea taimi lava na avaavau atu ai Kolani ia Talei,
“Ao..alu la i Ululoloa e eli mai lou kama eke dad iai, aua gei e koe fai mai ia a’u i se mea eke magao ai.”
Molimau Mele sa tagi Talei, tulei ese le meaai ma alu loa i le potu. O lea taimi na avaavau atu foi Kolani ia Justina lea o loo saofai foi i luga o le laulau, ae leai ma sana tala, ua na’o le saofa’i lava. O lana vaai iai e musu Justina e faatau mai Kolani nei tupu fo’i se vevesi.
O lea lava po na o’o atu ai Justina i le potu ma faapea atu ia Talei, “Talei ete le fia say sorry ia Kiuga?”. Sa tali mai Talei pe say sorry i le a, ae toe faapea atu Justina, “Na’o lou alu a e say sorry iai leaga o la ua ita.”
Na faailoa e Mele sa ia fautua ia Talei e alu e say sorry ia Kolani ona o la e iloa e lona tina, e pisa fo’i laua pe a oo atu i le potu ona o le mea lea.
Sa ia maitaua foi e iai aso e alu ai le ua molia e faigaluega e iai foi aso ua le alu, ona ua vaivai i faiga pati ma ana uo i le LTA, aua e pati lava i afiafi uma.
Sa ia maitauina fo’i e ita Kolani pe a fai atu ia Justina e inu, ae le inu. A tupu mea faapea ia ona amata loa lea ona inu se fagu uaina a Justina. O le inuga la lea e taape uma tagata ae toe ai lava o laua.
O lana maitau fo’i o le ua molia e lei vaai faatasi Mele o tago e sii se pepe, pe kisi i se tamaititi, e pei o tama uma i a latou fanau. E le’i vaaia foi pe sui foi se nappy o se tamaititi, aemaise i taimi o pepe. Na te le’i vaai lava o fai e Kolani se mea faapena.
(0)
