I taualumaga o le Faamasinoga Maualuga i le amataga o lenei vaiaso, na tulai ai se alii e suafa ia Alefosio Tokiana mai le afioaga o Aele e tali i ona moliaga o le faia lea o ni gaioiga mataga i se teineititi 12 tausaga.
I faamaumauga a leoleo, e faapea o luma o se faleoloa ao alu atu lea teineititi e faatau, ae faia ai loa e Alefosio lea gaioiga o le faaali o lona itutino sa i lea teineititi.
O loo teena e lea alii lona moliaga ae na ia talosaga i le Alii Faamasino mo se avanoa e saili ai sana loia e tulai mo ia.
Sa ioeina e le afioga i le Faamasino o le Faamasinoga Maualuga, Fepuleai Ameperosa Roma le talosaga, ma ua tuuina atu i le ofisa e faatumu ai se pepa (form) mo sana loia ae totogi e le polokalame a le Malo (legal aid).
Ua faatulaga e le Faamasinoga le Aso 20 o le masina nei e toe fofogaina ai lenei mataupu, ae o le poloaiga a le Faamasinoga, ia oo atu i lea aso ua maua sana loia.
E pei o tulaga masani o le Faamasinoga i le puipuiina o alo ma fanau e aafia i nei ituaiga soligatulafono mataga, o loo taofia le faailoaina o le suafa o lē ua aafia.
E fa moliaga o loo molia ai lenei alii ae o loo ia teena ia moliaga uma e pei ona tapenaina e le itu a leoleo.
(3)
