O le taeao o le Aso Lua na molimauina ai le sainiga feagaiga e faamatuu atu ai le ta’i $150,000 o se vaega tau seleni mo le poloketi tasi le miliona e pei ona faatino nei e le faigamalo a le Faatuatua i Le Atua Samoa ua Tasi.
O le itumalo o Gagaifomauga Numera 3, lea o loo tulai mai ai le afioga Laaulialemalietoa Leauatea Polataivao Fosi Schmidt o le Taitaifono a le FAST.
O le itumalo o Siumu, o loo tulai mai ai le tofa Tu’uu Anasii Leota sa fai ma faipule o le HRPP ae ua faasee atu nei e Tutoatasi.
O le itumalo o Lefaga ma Faleseela, o loo tulai mai ai le fetalaiga ia Masinalupe Makesi Masinalupe, o le Minisita Lagolago o Tiute ma Tupe Maua.
O le itumalo o Anoamaa 1, o loo tulai mai ai le afioga Alaiasa Sepulona Monanu, o se sui o le HRPP.
Ma le itumalo o Vaimauga 3, lea o loo avanoa i le taimi nei so latou tofi, ina ua tuumalo le afioga Tapunuu Papaliitele Niko Lee Hang, sa ia tauaveaina le tofi o le itumalo ma fai ma Taitaifono o le Komiti Faaitumalo (District Development Committee).
O le Sui Taitaifono o le Komiti a le Itumalo o Vaimauga 3, le afioga ia Ve’atauia Faatasi Puleiata ma isi sui o le komiti sa auai e sainia le feagaiga.
Na maua le avanoa e fesiligia ai le Minisita o loo nafa ma lenei poloketi, le afioga ia Leota Laki Sio Lamositele i sona finagalo e tusa o le faamoemoe.
Saunoa le Minisita, o itumalo e lima e pei ona sainia maliega e faamatuu atu ai nisi o vaega mo le poloketi, o itumalo o loo avatu iai le $150,000 tala ona e iai nai vaega laiti e ao ona faama’ea mai e ia itumalo.
Ae e iai foi itumalo ua faamatuu atu iai le $425,000 ona totoe ai lea o le isi $425,000 e tuuina mai mulimuli pe a ma’ea ona faa’aoga ma le tatau le seleni sa tuuina atu muamua e tusa ma taiala.
Na saunoa foi le Minisita, o le seleni $200,000 lea na muai tuuina mai, o le seleni lava lena sa aumai i le tausaga faaletupe 2021/2022, e mo le faatinoina o le fale poo le ofisa ma isi vaega.
Ae o le tausaga faaletupe 2022/2023 lea e aofia ai loa le tasi miliona.
Na ta’ua foi e Leota, “O itumalo e sefulu e pei ona faailoa i le taimi ua tuanai ua le agavaa, ua toeititi lava ma’ea feutagaiga ma nisi o vaega o loo latou tapena mai, ona faapena foi lea ona sainia a latou feagaiga mo le faamatuu iai o seleni o le poloketi.
O le Minisita o Tupe le afioga Mulipola Anarosa Molioo, na momoliina le saunoaga autu.
Sa tuualalo le Minisita i le paia o itumalo e lima ina ia galulue faatasi ma le Malo, aemaise le Matagaluega mo le sologa lelei o le poloketi, ma ia folau ma le faatuatua e manuia ai le faamoemoe.
(1)
