“E maualuga le talitonuga, na susunu e se isi le fale”.
O le faaiuga o le vaiaso na tea nei sa tulai mai ai se faalavelave na faatama’ia ai le fale o le PSA (Public Service Association).
Ae o se finagalo faanoanoa tele na faaalia e le Peresitene o le Asosi PSA, ona o le tulaga ua oo iai le fale o le asosi, ma le masalomia sa susunu e se isi.
O le talitonuga foi lea a le afioga i le Komesina o Tīneimu poo le FESA (Fire and Emergency Services Authority) le afioga ia Tanuvasa Petone Mauga ina ua fesiligia e le SGN.
“O le fale na susunu e se isi, ma e faigofie lava ona apo le afi ona ua leva le fale aemaise o le laupapa o loo tele ina fausia ai.”
Saunoa le afioga i le Peresitene ia Lesalenoa Karameli Tuala, sa iai le fuafuaga e toe faafou le fale mo galuega a le asosi, ona e lē o toe gafatia le tulaga lelei ma le malosi o le fale tuai mo le faa’aogaina i polokalame..
“Peitai, o le tulai mai o le malaia, o se tulaga mataga ma lē manaia, ae maise o le maualuga o le talitonuga na susunu e se isi lenei fale.”
“Na tā’ua e le Komesina o Leoleo, Auapaau Logoitino Filipo, e iai nisi na taofia mai e le Matagaluega mo suesuega, peitai, e lei faia iai ni moliaga ona sē ia mautu suesuega a leoleo.”
Na tā’ua e Auapaau o le molimau a aiga tuaoi, o le fale e fai ai evaga ma inuga ava malosi a le tupulaga ona e maitauina lava le pisapisao, peitai na faalogoina foi leo o le tupulaga i le po o le Aso faraile ae Aso Toanai faatamaia i le afi le fale”.
Saunoa le Peresitene o le asosi, “O le a tuu i luma o Le Atua lē na ia faatupuina le malaia”
O le asosi o le PSA, na faatuina i le 1969 ma resitalaina ai i le tulafono i le tausaga 1979, e pei ona saunoa Lesalenoa.
