Ua faamaonia mai e le Matagaluega o Leoleo ma Falepuipui le maliu ai o se alii pagota i totonu o le toese i Tanumalala.
I le feiloaiga masani ofisa faasalalau ma le Matagaluega o Leoleo i lenei vaiaso, na tā’ua ai e le Komesina o Leoleo Auapaau Logoitino Filipo, o loo masalomia le pule i le ola i le maliu faafuasei ai o lea pagota.
“E lei ma’ea suesuega a leoleo ae o loo masalomia sa ia faa’aogaina se vailaau oona (fagavao)..”
Sa le mafai ona tuuina mai e le Komesina le suafa o lē ua maliu, ae peitai, ua maua mai i nisi o molimau faamoemoeina i totoo le alii o Kolani Junior Lam.
O lenei alii sa faalauaitele le lipotia ai o taualumaga o le Faamasinoga Maualuga, ina ua faamaonia lona fasioti tagata faamoemoeina i lona lava toalua, o lē sa fai ma Pule Sili o le UTOS le afioga ia Sa’u Justina Sa’u.
O Tesema o le tausaga 2019 sa lau ai le faaiuga o lenei mataupu ma faamaonia ai e le Faamasinoga Maualuga le moliaga o le fasioti tagata faamoemoeina ia Kolani, ma tuuina atu ai ma le faasalaga e soloatoa i le toese.
I le asō sa saunoa le Komesina o Leoleo, “O le afiafi ananafi na faatopetope atu ai se alii pagota i le falemai i Leulumoega mo togafitiga e laveai ai lona ola, peitai, o anapo na maliu ai lea alii pagota.”
Saunoa foi Auapaau, “O le alii pagota ua maliu nei, ua tolu tausaga talu ona tuli lona faasalaga o le fasioti tagata faamoemoeina (murder) ae e galue o ia i le vaega e tofiaina mo le totōina o fualaau aina.”
Saunoa Auapaau e le’i mafai ona faailoa aloaia i le taimi nei le suafa seia maea ona feutaga’i le ofisa o leoleo ma le aiga o lē ua maliu.
Na fesiligia foi le Komesina pe faafefea ona maua le vailaau oona i totonu o le falepuipui, peitai, na saunoa Auapaau, o loo faagasolo suesuega a leoleo.”
O le masina o Novema 2022 sa toe tuuina mai ai le mataupu a Kolani Junior Lam i luma o le Faamasinoga Apili, mo le toe iloiloina. Ae peitai, e le’i taliaina e le Faamasinoga Apili lana talosaga.
E lei leva atu nei i le masina o Novema 2022 sa teena ai e le Faamasinoga Apili le talosaga a Kolani e toe iloilo le mataupu, ona sa ia fesiligia le lipoti a le fomai faapitoa (pathologist).
