“Ua pei o se avega e matuu ese atu”

"Lea ua iu ma le manuia, o le tali a lea ua tuusa'o mai lava e Le Atua".

0
3973

“Na pau lava le agaga faagaeetia ia te au o le faafetai i Le Alii i le faamasinoga o Justina, lea ua iu ma le manuia, o le tali a lea ua tuusa’o mai lava e Le Atua”.

O upu ia a le tina ia Sofia Sa’u Faasamoa Evile i fafo mai o le potu faamasino i Mulinuu, ina ua maea faailoa mai e le tamaitai loia a le itu a leoleo, le faaiuga o le faamasinoga ua faamaonia ai sa tagatavaleina e Kolani Junior Lam si ana tama teine o Sa’u Justina Sa’u.

“O le tali mai Le Alii” – Sofia Sa’u Faasamoa Evile

Na le ma gagana le toatele o aiga o lē sa fai ma Pule Sili o le UTOS, ae ua na’o le fusifusi o uso ma tausoga faapea lo latou tina, ma loimata maligi. Na faaalia e nisi o uso o le ua maliu…”Ua pei se avega e matu’u ese atu.”

E leo toe lilo lenei mataupu, ina ua maea le faamasinoga ma faatali ai loa le faaiuga a le Afioga i le tamaitai faamasino ia Niava Mata Tuatagaloa.

O se mataupu e faamauina i talafaasolopito o soligatulafono i le atunuu, ae o se mataupu sa toeitiiti atoa le masina o lona suesuega ao faaaolo molimau a leoleo i le taimi o le faamasinoga.

O le faaiuga a le tamaitai faamasino, sa taua e nisi o tausoga o le ua maliu o se tulaga faagaeetia i o latou lagona, peitai e le uma loimata o le ootia ona o le sa pele ua toesea ona o le malosi o le faama’i o loo vaai i soo se vaipanoa o le lalolagi i le taimi nei, ” O Sauaga i Totonu o Aiga”.

O le sa Pule Sili o le UTOS, Sa’u Justina Sa’u

Na faafetaia e le tina ia Sofia le toatele sa fai sao atu i lenei faamasinoga, a’o tau saili e le faamasinoga le mea moni na tupu i le po o le Aso Toana’i a malama le Aso Sa 21 o Oketopa, 2018.

Sa faafetaia lo latou afioaga, o lo latou aiga, o le itu a leoleo, e o’o lava foi i le au faasalalau ma tusitala, o le gagana o le fiafia ua le mataofiofia…”Faafetai i la outou galuega.”

O le mataupu i le maliu o Justina o se lautusi o solitulafono ogaoga, tau aiga o lenei fo’i seneturi i Samoa.


Maina Vai