Ioeina e se Tinā le Moliaga o le Fasioti Tagata Paivalea

0
267

Ua ioeina e le tinā ia Susana Lave Lala moliaga e faasaga ia te ia, i le maliu ai o lana tama teine e 13 tausaga.

Fesootai mai le Ofisa mo nisi faamatalaga.

O le faatolu ai lea ona tulai lenei tinā, 37 tausaga mai le afioaga o Toamua i luma o le Faamasinoga. Sa tolopoina mai lenei mataupu mai le tausaga talu ai ae sei saili se loia e tulai mo Susana.

O le vaiaso nei ua faamaoniaina ai moliaga e lua i luma o le Faamasinoga Maualuga, e aofia ai le fasioti tagata paivalea (manslaughter) ma lona umia o se aupega matautia (armed with dangerous weapon).

Fesootai mai loa Tapusoa poo Christabelle mo nisi faamatalaga.

O le faatoa tulai mai o lenei mataupu, sa tā’ua ai e le Sui Komesina o le Matagaluega o Leoleo, Papalii Monalisa Tiai-Keti, o le faalavelave na tulai mai ina ua umia e lenei tinā se maa e fai ma aupega. E togi atu ae lavea ai le ulu o lana tama teine

O le mataupu e faapea sa sasa e lenei tinā lana tama e 11 tausaga. Ua sasa sasa le tamaititi ae mamulu ese loa ma sola mai i lima o le tinā.

Ao tamoe ese atu lana tama lea sa fasi, ona tago ane loa lea o le tinā i se ma’a e togi ai. Ae alu atu le maa lē lavea le tamaititi na sasa, ae lavea ai lana tama teine o loo lata ane.

“O le ulu o lana tama teine 13 tausaga sa lavea i le maa na togiina e lenei tinā.”

O le ma’a o se aupega matautia, lea ua molia ai lenei tinā i lona umiaina ma faaogaina e faaoo ai le maliu i lana tama.

I suesuega a leoleo, o le aso e sosoo ai na faatoa faanatinati ifo ai i le falemai i Motootua le tama teine lea sa lavea i le maa lona ulu, ma maliu ai lava o ia.

O le uluai valaauina o lenei mataupu i luma o le Faamasinoga, sa leai se loia e tulai mo Susana. Sa poloaiina e lana afioga i le Faamasino ia Fepuleai Ameperosa Roma lea tinā ina ia saili sana loia e tulai mo ia, ona e ogaoga moliaga o loo feagai ma ia.

O le alii loia ia Tuatagaloa Shane Wulf sa tulai mo lenei tinā i le vaiaso nei, i lalo o le polokalame fesoasoani a le Malo (legal aid).

Ua faatulaga e le Faamasinoga le Aso 8 o Mati e toe valaau ai lenei mataupu i luma o lana afioga ia Niava Mata Tuatagaloa.