Tali le Fofoga Fetalai i se Tuuaiga a Tuilaepa ma Ata i luga o le Facebook

0
4366

Ua momoli mai se tali tusia a le Fofoga Fetalai Hon Papalii Lio Oloipoa Taeu Masipau, i se tuuaiga a lē sa avea ma Palemia o Samoa le susuga Tuilaepa Sailele Malielegaoi.

I se feiloaiga masani a Tuilaepa ma le vasega o tusitala i Samoa nei sa saunoa ai Tuilaepa, “O loo faatonutonu e le Minisita ia Laaulialemalietoa le faatautaiga o galuega fai a le Minisita o le maota.”

Saunoa le Fofoga Fetalai, ua faaoga e le taitai o le HRPP lea o loo faatea mai le Palemene, se ata puupuu na tuuina mai i luga o upega tafailagi, e fai ma mau a lea tuuaiga faasaga atu ia te ia.

Peitai, e tetee malosi le afioga i le Fofoga Fetalai ma ia tā’ua ai le taufaasese tele o nei ata ua tuuina atu i le Facebook.

Ua saunoa Papalii, “E lē o iai lava se isi poo se Minisita o ia faatonutonu maia la’u pito laau poo le faatinoga o o’u tiute Faa Fofoga Fetalai o le Maota..”

Sa maua foi e le SGN se faatalanoaga ma Papalii i luga o le telefoni, ma ia toe tā’ua ai, o se ata ua faia e se isi ma tuu atu i luga o fesootaiga o Api o Foliga poo le Facebook, o loo vaaia ai lea tulaga.

Peitai, o loo molimau ma faafofoga foi le atunuu i fesootaiga faaonapo nei, o loo tuuina atu ai taualumaga uma o le fonotaga a le Palemene.

“E lē o iai se tulaga faapea, ona o loo faatino lava le tiute a le Fofoga Fetalai, e tutoatasi. E aunoa ma se tulaga faapea o loo faatonutonu mai ai e se Minisita le faatinoga o tiute a le Fofoga o le Maota.”

Saunoa foi Papalii, “O le tula’i mai o le faigamalo o loo tulai mai nei i le foe mo le taitaiina o le atunuu, lea ua toe faafoi ai le tutoatasi o le Palemene, ma o se faiga sili lea..”

Saunoa Papalii, “Ua le toe aiāina lava e le Kapeneta poo se isi malosiaga e sili atu le faatinoga le tiute o le Fofoga o le Maota i totonu o le Palemene.”

Ua saunoa foi Papalii Lio, o saunoaga ma tuuaiga le moni ma le lē faavaea a Tuilaepa, ua taitai sese ai le faafofogaaga a le atunuu.