Ua tolopo nei i le amataga o le tausaga fou le valaauina o le mataupu o loo tua’ia ai se tina i le maliu ai o lana tama teine.
O Susana Lavea Lala, 37 tausaga mai Toamua ma Safotu, o loo molia i le iai lea o lona sootaga i le maliu o lana tama teine 13 tausaga.
Sa tolopo mai lana mataupu i le Aso Gafua talu ai ae sei saili sana loia e totogi e le Malo, e tulai mo ia ona o le ogaoga o ona moliaga.
O le taimaitai loia o Leinafo Taimalelagi Strickland lea ua tulai mo lenei tinā.
Sa talosaga le tamaitai loia ia Leinafo mo se avanoa e tuuina atu, sei la feutaga’i ai ma le tina ia Susana.
Ua faatulaga mai ai e le Alii Faamasino ia Fepulea’i Ameperosa Roma le Aso 30 Ianuari 2023 e toe valaauina ai lenei mataupu.
O le tina ia Susana o loo tua’ia i le maliu ai lana tama teine. Sa faailoa e le Sui Komesina o Leoleo, e 11 tausaga le tama teine a Susana sa mamulu ese ma ona lima i le taimi na ia sasa ai.
O loo tuuaia lenei tinā, ina ua ia faa’aogaina se maa e togi ai lana tama lea na sasa.
Peitai na lavea ai le isi ana tama teine 13 tausaga sa lata ane. Na maliu ai lava o ia ona o le ogaoga o manu’aga i lona ulu.
O le aso na sosoo ai talu ona lavea le teinetiti i le maa, ae faatoa faaoo atu i le falemai. Ona sa manatu lava lea tina ma lenei aiga, e leai se mea o afaina ai o ia.
Ua faatulaga nei e le Alii Faamasino ia Fepuleai Ameperosa Roma le Aso 30 Ianuari 2023 e suesueina ai lenei mataupu i luma o le faamasinoga maualuga.
(13)
