Falepuipui i le 22 Masina se Alii sa Faaoolima i lona Toalua, ae fai mai o lana Miti sa Fai

0
14483
Court House Mulinuu photo: RNZ

Ua fai Kerisimasi se tama talavou i Tanumalala ina ua faamaonia lona faaoolima i lona toalua.

O Ioane Taupo Sefo, 25 tausaga, sa faamaonia e le Faamasinoga, sa ia saofai i luga o le manava o lona toalua ma titina, ae na ia faailoa i luma o le Faamasinoga, o lana miti sa fai.

E 22 masina le faasalaga sa tuuina mai e le Faamasinoga.

I le tolaulauina o le faaiuga o lana Afioga i le Faamasino o le Faamasinoga Maualuga iā Niava Mata Tuatagaloa, na ia saunoa ai, o loo matauina i faamaumauga a le itu a leoleo, o le 2019 na molia ai lea alii i le talepe fale, ae o le 2021 na tuuina atu ai le 12 masina e te nofo vaavaaia ai.

Ae peitai, e lei maea lea taimi ae toe molia mai i isi foi moliaga.

Na saunoa Niava i le matautia o gaioiga faasolitulafono sa faatino e Sefo, lea ua toe tula’i ai foi i luma o le Faamasinoga.

“O le Aso 14 o Iuni 2023 na toe molia mai ai oe i lou saofai lea i luga o le manava o lou toalua ma titina, ae e famai o lau miti..

“Sa e faaoolima foi i le tamā o lou toalua, ma e toe momo’e i fafo ae tau’ai mai le fale i ma’a.”

“O se gaioiga ua atagia mai ai le leai o se suiga ia te oe ma sa vaai mamao..Ua fai lou atalii poo lou afafine, ae o au gaioiga uma ia, e leai se faamama avega e tuuina atu.”

O loo faatupulaia pea le soligatulafono o le sauaina o tina ma tamaitai e i latou o loo latou nonofo faaleulugalii (intimate partner violence).

E ui ina tele polokalame faagasolo, ae o loo tula’i mai pea mataupu e atagia mai ai, o loo iai pea le talitonuga o le itupa o tamā, e iai lo latou malosiaga (power) e faaolima ai i tinā.