Le Toe Talia e le Faamasinoga se Mafuaaga e Faatuai ai ona Tagofia le Mataupu a Talalelei Pauga

0
1447

“E le talia e le Faamasinoga se isi mafuaaga o le a faatuai ai ona tagofia e le Faamasinoga le mataupu, e mafua mai le loia ma le itu o loo molia poo le faaleaogaina loa o aiaiga o le tatala ai i tua.”

O le saunoaga lea a le Afioga ia Niava Mata Tuatagaloa i le Faamasinoga i lenei vaiaso, ina ua toe tulai ai Talalelei Pauga.

E lei mafai ona tulai le alii loia o Tufuga Fagaloa Tufuga, e pei ona ia tauaveina mai ai lenei mataupu, peitai, na tulai le tamaitai loia o Seiuli Katarina, ma talosagaina se isi taimi, aua na te lei mauaina faamaumauga o i latou sa molimau, e pei ona poloaiina e le Faamasinoga.

Na fesiliga e le Faamasino le itu a leoleo pe na faaoo pepa molimau i le itu o loo molia, ae na tali le itu a leoleo, ua maea ona momoli iai vaega e pei ona tuuina mai le faatonuga o le Faamasinoga.

Ua faatulaga e le Faamasinoga le Aso 18 agai i le Aso 24 o Mati 2024, e suesueina ai lenei mataupu ua loa tausaga o tālia pea lona suesuega

O le valaauina o le mataupu i le vaiaso talu ai, na talosaga ai e le loia a Talalelei Pauga, ina ia tuuina i le itu molia, faamaumauga o molimau i le taimi ao suesueina ai nisi ua faamaonia ma tuli o lataou faasalaga, e aofia ai Malele Paulo, Lema’i Sione ma Taualai Leiloa.

Na teena e le Faamasinoga lea talosaga.

O le faaiuga o le Faamasinoga, o le a lē toe suia le faatulagaina o le vaiaso; 18-24 Mati 2024, e valaauina ai molimau, ma suesueina ai loa lenei mataupu.

Public Notices from UTOS