Fa’aauau le Tulaga Lelei o le Tamaoaiga o Samoa pe a Faatusatusa i le isi Tolu Tausaga Talu Ai

0
813

O loo fa’aauau le tulaga lelei o le tamaoaiga o Samoa pe a faatusatusa atu i le isi tolu tausaga talu ai.

I le tala faatatau o le tupe faaopoopo 2023 i le 2024 muamua, lea ua taatia nei i luma o le laulau fono o le Palemene, na folasia e le Minisita o Tupe, lana Afioga ia Lautimiuia Uelese Afoa.

Saunoa Lautimuia, “Ua siitia maualuga le tamaoaiga a le atunuu i le 8%, e tusa lea ma le 2.55 piliona, e faatusatusa atu lea i le isi tolu tausaga talu ai, ua atagia mai ai le mafai lea ona faufau e le Malo lona tamaoaiga.”

“O aitalafu a le Malo, ua faamamaina tusa lea ma le 907.5 miliona, tusa lea ma le 35.6% le tamaoaiga, i le faaiuga o le tausaga faatupe 2022 i le 2023. O nei faaitiitia e mafua mai i le toe faia o ni aitalafu fou, aemaise o le faaauauina pea ona totogi nei aitalafu.”

“Ua faamauina foi le gafatia e le Malo o tupe totogi mo fefaatauaiga e pei ona faamauina le 1.14 piliona tupe faagaga kuata muamua.”

“E 9.1% na faamauina le tau o le soifuaga mo le 12 masina, na faamauina i le 2023. Ua faamauina foi le 2.9% ua tuu inititia ai pe a fua atu i le isi 12 masina sa faamauina.”

“Ua faamauina foi le siitia o le numera o tagata faigaluega i le 6.2% poo le 25,976 tagata faigaluega, e faatusa lea i le kuata ua mavae talu mai Setema 2019.”

“O loo faamauina foi le siitia o le numera o tagata faimalaga mai, e pei ona faamauina 48,620 i totonu o le kuata ua faama’eaina ia Setema 2023. Tusa o lea e 233.8% e siitia ai, ae o loo faamauina foi o Niu Sila ma Ausetalia, o numera silia o turisi, faapea tatou tagata o malaga asiasi mai. O loo faamauina foi 230.3% tupe maua mai pisinisi tagata tafafao maimoa mai, ua faamauina ai 159.36 miliona faamauina kuata muamua.”

“Ua faamauina foi le pa’u o le tau suauu nei masina.”

O le ripoti o le Tala Faatatau o le Tupe Faaopoopo lea ua folasia i luma o le Palemene, e faatoa avanoa i felafolafoaiga sui o le Palemene i le tauaofiaga o le masina o Ianuari 2024.