Faia le Savali o le Filemu i le Fale Faamasino a Tagata Lagolagoina le Mataupu a le FAST

O le taeao nei lea na fa’atinoina ai se Savali o le Filemu, e tusa ma le selau o tagata o le atunu’u o lo’o ave le latou lagolago i le Vaega Fa’aupufai a le Fa’atuatua i le Atua Samoa ua Tasi (FAST).

O lenei savali na va’aia ai tama ma tina matutua, faapea le fanau iti ma o latou fa’ailoilo e fa’ailoa ai lo latou le taliaina o le toe fo’i o Samoa e toe faia se isi ana faigapalota, e pei ona fuafuaina nei mo le aso 21 o le masina lenei o Me.

O nisi o faailoilo sa taua ai upu nei, “Ua le talitonuina le Ao o le Malo”.. “Fai mea piopio le HRPP”… “Tatou te tutusa i lalo o le tulafono”… “We the people are not stupid”.. “Government for the People, by the People”.

Na mafai ona auai iai le to’atele o Malu o le Malo e latou te taumafai e fa’afoefoe lenei Savali i le taeao analeila ma fautuaina i latou uma na auai ina ia tausisia tulafono o le filemu, aemaise o lo’o fa’agasolo taualumaga i totonu o le Maota Fa’amasino.

O le Savali lenei o le Filemu na fa’ailoa e se tasi o tina ia Tapuni Ula o Faleasi’u, sa ia auai atu e fa’aalia lona le fiafia i le faaiuga e pei ona malele ai le Afioga i le Ao Mamalu o le Malo i le afiafi o le Aso Lua, e toe fo’i Samoa e toe fai le faigapalota tele.

O le finagalo o le tina, ina ia talia le tali o le Faamasinoga o loo loma nei, ma tauaofia loa le Palemene e fua i fainumera o lo’o iai nei.

O mata’upu e pei ona fofogaina i le fa’amasinoga maualuga i le taeao analeila, lea ua fa’aleaogaina ai e Afioga i Fa’amasino le talosaga a le Loia Sili ma le Ofisa o Faigapalota ina ia taofia ai le fa’agasolo o le iloiloina o le nofoa fa’aopoopo o le Palemene e pei ona tofia ai le Afioga ia Aliimalemanu Alofa Tu’uau, o le Itumalo o Alataua i Sisifo.

O le aso 17 o le masina lenei e fofogaina ai le auiliiliga o se fa’ai’uga a Fa’amasino, pe e talia lea nofoa fa’aopoopo e pei ona sainia e le Ao Mamalu o le Malo, pe leai.

(0)