Faa-Samoa

Faatupulaia le Gaoi ma le Faaoolima i Faleoloa o Tagatanuu Saina

May 2, 2025

329

Ua faateteleina le solitulafono o le osofaia lea o pisinisi faleoloa poo supamaketi i totonu o Samoa.

Ua le gata i le aveesea o mea totino, ae ua faateteleina le faaoolima i tagata e onaina pisinisi.

O loo sailia e le Matagaluega o Leoleo ni alii se toalua o loo maua atu i masini pueata a le supamaketi o le Bargain Mart i Vaitele, o loo la gaoia ma la’u ese oloa o le faleoloa.

Na faamaonia mai e le Sui Komesina a le Matagaluega o Leoleo ma Falepuipui le susuga ia Papalii Monalisa Tiai Keti le faatupulaia pea o lenei soligatulafono.

Saunoa Papalii, o le faaiuga o le vaiaso ua mavae na ulufale ai ni alii se toalua ma faaoolima i se tamā faipisinisi mai Saina sa iai i totonu o le Bargain Mart.

“Sa faaaogaina se mea maai e faaoolima ai i lē ana le pisinisi, ma aveese mai ai se tino tupe, faapea fo’i ma le ki o le faleoloa ma le ki o le taavale.”

O le tasi nei o solitulafono ua le misi se vaiaso ma tulai mai i pisinisi a tagata maI Saina.

Ua leai fo’i se mata’u o le tupulaga i mea pueata poo camera o loo faapipii i totonu o faleoloa, ae ua ulufale lava ma aveese mai tupe ma faaoolima i nei faipisinisi.

O loo tulai i luma o le Faamasinoga se alii talavou 20 tausaga sa ulufale i le Ninety Nine Shop ma ia aveesea se tino i tupe e silia ma le $20,000 tala. O lea faalavelave na tula’i mai i le vaveao o le kerisimasi 2024, ma na ia aveesea ai fo’i ma se taavale sa paka ai iuma o lea faleoloa.

E faapena fo’i se gaioiga na aafia ai le fale taavale o le Sai Motors. Na ulufale faamalosi i totonu o le lotoā ma aveese ai se taavale o le ituaiga X-trail.

O ni telefoni taugatā ma masini laptop sa aveesea mai le faleoloa o le IT ZONE. Ae se tasi o faleoloa i Moamoa, na ulufale ai fo’i ni alii se toalua o loo ufiufi o la foliga, ma aveese mai le masini o loo teu ai tupe a le faleoloa.

O le faamanatu a le Matagaluega o Loleo i le atunuu, soo se isi na te silafia se faamatalaga i taulelea o loo tau sailia nein ia faafesootai ane se ofisa leoleo o lata ane.

Ua lapatai mai fo’i le Ofisa o Leoleo, ina ia tautuana e le mamalu o le atunuu – e solitulafono lou faalafi lea o se isi o loo sailia e le Matagaluega o Leoleo.